Áńgimelesý barysynda qor qarajatyn maqsatty jumsaý, sondaı-aq pandemııa kezindegi medısınalyq saqtandyrý júıesiniń jumys máseleleri talqylandy.
Qordyń basqarma tóraǵasy Aıbatyr Jumaǵulov sondaı-aq áleýmettik jelilerde óz otbasyna qatysty, kólik daýy týraly taratylǵan aqparatqa túsinikteme berip ótti. ÁSQ basshysy bul oqıǵa osydan 13 jyl buryn, 2007 jyly ıaǵnı Aıbatyr Jumaǵulov áli memlekettik qyzmetke kelmegen kezde bolǵanyn atap ótti. Bul aqparat áleýmettik jelige tórt jyl buryn jazylǵan edi.
«Pandemııa ýaqyty, adamdarǵa syılyqtar taratyp, toı toılaıtyn kezeń emes. Keıbir adamdar muraǵattan tórt jyl burynǵy áleýmettik jelilerdegi posty shyǵaryp, qazirgi tańda oryn alǵandaı etip kórsetip otyr. Osyndaı jańalyqtardy taratý ne úshin kerek bolǵanyn túsinbeımin. Bul aqparat halyqtyń ashý-yzasyna tıedi dep oılaımyn. Biraq bul baryp turǵan ádepsizdik dep bilemin. Bizdiń otbasymyzda bir ǵana kólik bar», – dep atap ótti Aıbatyr Jumaǵulov.
ÁSQ basshysynyń aıtýynsha, áńgime bir mezgilde kólik satyp alý týraly emes, olardy birtindep aýystyrý týraly boldy. Aıbatyr Jumaǵulov neke qıǵan 25 jyl ishinde ortaq otbasylyq avtokólikti jańartyp otyrǵandaryn aıtty.
Osylaısha qordyń basqarma tóraǵasy jurtshylyqpen dıalogqa óziniń qaı kezde de ashyq oıyn bildire alatynyn, kez kelgen suraqqa jaýap bere alatyndyǵyn kórsetti.
Sonymen qatar Aıbatyr Jumaǵulov qordyń 1406 call-ortalyǵy, sondaı-aq qosymshalar jelisinde qoljetimdi Qoldau 24/7 mobıldi qosymshasy arqyly qabyldanatyn azamattardyń shaǵymdarymen jumysy týraly aıtyp berdi.
«Qosymshaǵa qońyraý shalý kezinde irkilister boldy. Bul qońyraýlardyń kóbeıýine baılanysty, kúnine 30 myńǵa deıin qońyraý kelip tústi. Biraq bizde call back, ıaǵnı keri qońyraý jumys isteıdi. Qoldau 24/7 mobıldi qosymshasy bar – bul medısınalyq qyzmetterge shaǵym jiberýge bolatyn mehanızm. Olar bas dáriger men densaýlyq saqtaý basqarmasyna kelip túsedi. Eger shaǵymdar negizdelgen jáne sheshilmegen bolsa, onda bul máselelerdi júıeli túrde talqylaý úshin bizdiń shtabtarǵa jetkizemiz», – dep atap ótti Aıbatyr Jumaǵulov.
Qordyń basqarma tóraǵasy blogerlerdiń suraqtaryna jaýap berip, mundaı kezdesýler keń aýdıtorııa arasynda aqparatty taratý úshin yńǵaıly format bolyp tabylatynyna toqtala ketti. Kezdesý sońynda mundaı jıyndardy júıeli túrde onlaın-formatta ótkizý usynyldy.
