Sondaı kezde el ishin úreı bılegeni sonshalyq, jurt aýrý juqtyrǵan kishkentaı sábılerin, qart ata-analaryn tastaı qashypty. Biraq indet qashqandardy da qýyp jetipti.
Mynaý indet te álemge dál sondaı úreı shashyp tur. Qazir Jer shary bastan keship otyrǵan jaǵdaı bizdiń eldi de jaılady. Osyndaı aýyr kezeńde jaýapty degen keıbir sheneýnikterdiń jaýapsyzdyǵy indetti odan saıyn asqyndyrdy. Otanshyldyq degen osyndaıda kórinedi ǵoı.
Qarapaıym halyqtyń ishinen shyqqan isker adamdar ózderi uıymdastyryp, qınalyp jatqandarǵa qolushyn berip, dári-dármegin shetelderden aldyrtyp jatyr. Sondaı jandardyń qyzmeti eselep qaıtsyn dep tileımiz.
El Prezıdenti Q.Toqaev ár mınıstrlikke qatań tapsyrmalar berip, naqty talaptar qoıdy. Sol tapsyrmalar óz dárejesinde oryndalsa eken dep tilep otyrmyz endi.
О́kinishtisi – qazaqtyń talaı arystaı azamattary qurban boldy. Endigi amal ne bolmaq? Árıne, eńseni túsirip otyra berý emes. Úreıge boı aldyrmaı, syrqattanyp jatqan adamdarǵa jiger berip, bala-shaǵanyń kózinshe ólim týraly áńgime aıta bermeı, árkim óz oshaǵynda barlyq saqtyq sharalaryn jasaýy kerek dep oılaımyn.
Jaýapty mekemeler men sheneýnikter dári-dármekterdiń óńirlerge, jergilikti jerlerge jedel jetkizýdi uıymdastyrýǵa barynsha kúsh salýy kerek. Qazirgi ýaqytta aýyryp jatqan naýqastar úshin ár kún, árbir mınýt mańyzdy.
Azaly otbasylaryna qaıǵyryp kóńil aıtamyz. Qazaq «qazanyń arty qaıyrly bolsyn» deıdi mundaıda. Ár otbasynda amanshylyq bolsyn! Syrqattanyp jatqandarǵa jeńildigin bersin!
Ońaıgúl Turjan,
aqyn
