Bir maskúnemdi sabasyna túsirý úshin jedel top shaqyrmaı, mılısııa maıorynyń ózi buzaqyny aýyzdyqtaýǵa jalǵyz barady. Biraq adamdyq keıipten shyǵyp, haıýandyq kúıge túsken maskúnem eshkimniń qoıdyrǵanyna qaramaı, qolyndaǵy lypyp turǵan ustarany jan-jaǵyna sermep, áıeli men kórshilerin bir buryshqa tyǵyp qoıǵan eken. Ol kezdegi mılısııada qarý da bolmaıtyn, sondyqtan A.Sherbakov buzaqyǵa qarsy jalań qolymen aıqasqa shyǵyp, ony sabasyna túsiredi. Alaıda anaý da qolyndaǵy ustaramen maıorǵa jeti jaraqat salyp úlgergen eken. Maıor et qyzýymen ózine aýyr dene jaraqaty salynǵanyn da sezbeı qalady. Dárigerler A.Sherbakovty aman alyp qalý úshin qoldan kelgenderin jasap baǵady, biraq jandy jerden tıgen pyshaq jaraqatynan onyń ómirin qutqara almaıdy.
Sodan beri keshe týra 30 jyl ótipti. Maıordyń qyzmettik mindetin atqarý ústinde qanǵa boıalǵan kóılegi men sol kúni janynda bolǵan jeke zattary qazir mýzeı eksponattarynyń qatarynan oryn alǵan. Al esimi erlikpen qaza tapqan polısııa qyzmetkerlerine arnalǵan memorıaldyq taqtaǵa qashalǵan. Sonymen birge týyp-ósken Aqqaıyń aýdanynyń Smırnovo kentindegi kóshelerdiń biri jerlesteriniń esimimen atalyp, oqyǵan mektebiniń qabyrǵasyna da memorıaldyq taqta ornatylǵan.
Qazir polısııa qyzmetkerlerine qarsy qol kóterý qylmyskerler arasynda úırenshikti ádetke aınalǵan. Osynyń ózi zańnyń solqyldaqtyǵynyń bir kórinisi. Bir kezde "bılikke qarsy qol kóterý" degen arnaıy baptyń jazasy óte qatal bolatyn. Sondyqtan qylmyskerler formaly adamǵa qol kóterýdi oılamaıtyn. О́tken naýryz aıynda ǵana Petropavlda taǵy bir buzaqy polısııa kapıtany Janat Muhamedjanovqa pyshaqpen jaraqat saldy. Árıne, qazir polısııa qyzmetkerlerine atý qarýy berilgen, biraq ony da ońdy-soldy qoldana bermeısiń ǵoı. Abzaly jazanyń qatańyraq bolǵany kerek.
PETROPAVL
