Joba boıynsha aımaqqa elimizge belgili ǵalymdardy shaqyryp, oblys turǵyndaryna Abaı Qunanbaıuly, Shoqan Ýálıhanov, Ábý Nasyr Ál-Farabı syndy uly tulǵalardyń ómiri men shyǵarmashylyǵy týraly dárister uıymdastyrylý kerek bolatyn. Ashyq dáristerdi qalaǵan tyńdarman qatysa alatyndaı ashyq alańda ótkizý kózdelgen. Osyndaı maqsatpen basqarma shaqyrtýymen naýryz aıynda belgili ǵalym Ǵarıfolla Esim Qostanaıǵa kelip, hákim Abaıdyń danalyq dúnıetanymy týraly dáris oqýy tıis edi. Biraq ıgi bastamaǵa álemdi jaılaǵan indet kedergi bolyp, pandemııa óz pármenin júrgize bastady. Aımaqta shekteý sharalary jarııalanyp, adam kóp shoǵyrlanatyn sharalardy ótkizýge tyıym salyndy. Osylaısha, ǵalymnyń Qostanaıǵa issapary amalsyz keıinge shegerildi.
Karantın ýaqyty uzaryp, eldegi sanıtarlyq saqtyq sharalary aıaqqa tusaý sala bergen soń, ishki saıasat basqarmasy abaıtanýshymen kezdesýdi bıyl elimizde tuńǵysh ret atalyp ótip jatqan Abaı kúnine oraılastyrypty. Basqarma ókilderi ǵalymnyń "Hákim Abaı jáne qazirgi zaman" dep atalatyn vıdeodárisin 3 tamyz kúni Nur-Sultan qalasynda beınetaspaǵa túsirip alǵan. Ǵalymnyń abaıtanýǵa qatysty tyń oılarǵa toly bul dárisi búgin, ıaǵnı 10 tamyz – Abaı kúni merekesine oraı saǵat 10:00-de jergilikti "Qostanai" telearnasynyń efıri arqyly arqyly kórsetildi.
Qostanaı oblysy
