14 aqpanda Afrıka qurlyǵy boıynsha alǵashqy jaǵdaı tirkelgeli aımaqta 25 143 adam vırýstan qaıtys bolyp, shamamen 700 000 kisi emdelip shyqqan. DDSU aımaqtaǵy jaǵdaıdyń aýyr ekenin aıtyp, dabyl qaqty. Sarapshylar vırýs juqtyrý deregi resmı statıstıkaǵa qaraǵanda áldeqaıda kóp degen pikirde.
Kórsetkishtiń jartysy Ońtústik Afrıka elderinde tirkelgen. Naýqastar sany boıynsha Ońtústik Afrıka kósh basynda. Elde 11 556 vırýs deregi anyqtalǵan. Odan keıin Mysyr, Nıgerııa, Gana, Aljır, Morokko, Sýdan men Kenııa tur.
Alaıda DDSU-nyń Afrıka boıynsha jaýapty mamany Merı Stıven Al-Jazeera basylymyna bergen suhbatynda «Afrıkadaǵy epıdemııa jaǵdaıy shegine jetpedi» degen pikir aıtty. Mamannyń aıtýynsha, birneshe memleket karantın rejimin jeńildetkennen keıin vırýs juqtyrý jaǵdaıy kúrt kóbeıgen. «Degenmen vırýs juqtyrǵan mıllıon adamnyń 80 paıyzy 10 eldiń azamattary», deıdi ol.
Naqty derekke nazar salsaq, álemniń 54 elinde taraǵan vırýs 21 mln-nan astam kisiden anyqtaldy. Onymen qoımaı jahandyq ekonomıka men memleketterdiń densaýlyq saqtaý júıesine áser etti. Al Afrıkadaǵy jaǵdaıdyń múshkil bolýyna test pen aqparatqa qoljetimsizdik sebep deıdi mamandar. О́ıtkeni 58 mln halqy bar Ońtústik Afrıkada tek 10 mln adamǵa synama jasalǵan. Al 17 000 naýqas tirkelgen Kamerýnda 25 mln halyqtyń 1 paıyzy ǵana tekserýden ótken.
BUU sońǵy jaǵdaı aımaqty qarjylyq daǵdarysqa alyp kelýi múmkin degen boljam aıtady. DDSU ókili Merı Stıven jaǵdaıdy túzeý úshin 2014 jylǵy ebola epıdemııasyn nazarǵa alý kerek ekenin, soǵan saı qabyldanǵan sharalar aımaqtaǵy ahýaldy jeńildete alatynyn aıtty.
