Qabyldanǵan karantın sharalarynyń nátıjesinde ınfeksııanyń taralý tizbegin úzip, medısına uıymdary men qyzmetkerler júktemesin edáýir azaıtýǵa qol jetkizildi.
«Qazirgi ýaqytta stasıonarlarda 343 adam bar. Aýrýdyń sharyqtaý sheginde 4 myńǵa jýyq adam boldy. Alty aptaǵa sozylǵan karantın arqyly koronavırýstyń taralýyna baılanysty jaǵdaı retteldi. Memleket qabyldaǵan sharalar dárigerlerge óz jumystarymen tikeleı aınalysýǵa – adam ómirin saqtaýǵa múmkindik berdi. Medısına qyzmetkerleri árbir naýqasqa tıisti kóńil bóldi. Biz tómendeý dınamıkasyn jalǵastyryp qana qoımaı, karantın nátıjelerin de bekitýimiz kerek.
Infeksııa taralmaýy úshin aýqymdy sharalar qajet. Bul qatań sanıtarlyq-epıdemııalyq normalardy saqtaý arqyly ǵana múmkin bolmaq. Karantındi jeńildetý vırýs túbegeıli joıyldy degendi bildirmeıdi. Onyń qaýpi áli de bar. Týystaryńyzdy qorǵaý úshin qatań sanıtarlyq normalardy ustanyp, qonaqqa adam kóp jınalatyn oryndarǵa barýdan bas tartý qajet», dedi elorda ákimi Altaı Kólginov.
16 stasıonardyń altaýy jabyldy – ondaǵy barlyq naýqas emdelip shyqty. Stasıonarlardyń júktemesi 99%-dan 17,2%-ǵa deıin tómendedi. Barlyq qalalyq emhanalar aldyn ala jazylý boıynsha josparly qabyldaýdy qaıta bastady. KVI belgileri bar naýqastardy qabyldaý boıynsha fıltr-kabınetterdiń jumysy jalǵasýda.
Ákimdik medısına mekemelerine 600-den astam floýmetr, 500 ottegi konsentratory, 500 arnaıy kereýet, ókpeni jasandy jeldetý jáne kompıýterlik tomografııa apparattaryn jetkizdi. Medısına jabdyqtary men dári-dármek satyp alý boıynsha jumystar turaqty negizde júrgizilýde.
