Talaı otandasty ortamyzdan alyp ketken indetti eńserý jolyndaǵy qat-qabat jumystar bastaýyna elin súıgen júrekter men qýatyn halyq ıgiligine jumsaǵan qurysh bilekter toǵysty. Dárigerler men kásipkerler, eriktilerdiń eńbegin el joǵary baǵalaýda, al taǵdyrdyń jazýymen temir tordyń arǵy betinde tirlik etip jatqandardyń da bul alasapyran shaqta qalys qalmaı, el densaýlyǵyn saqtaýǵa óz úlesterin qosa alǵany jan jadyratady.
Ádette sottalǵandarǵa tiksine qarap, olar týraly ońaılyqpen jyly qabyldaı almaı qalatynymyz ras, alaıda ártúrli jaǵdaıda bostandyǵynan aıyrylǵan olardyń da el basyna kún týǵan qıyn shaqta jaı qarap qala almaıtynyn uǵyndyq.
IIM Qylmystyq atqarý júıesi komıteti Mańǵystaý oblysy boıynsha departamentine qarasty GM 172/6 túzeý mekemesinde shaǵyn seh qurylǵan. Pandemııaǵa deıin arnaıy kıimder tigip, jıhaz jasaýmen aınalysqan seh karantın engizilgen aýyr shaqta jaǵdaıǵa tez beıimdelip, ózge óndiristerdi jaýyp, tek dárigerlerge, ózge de suranys bergenderge arnalǵan qorǵanysh kıimderin, betperdelerdi tigýge jumyldyryldy. Qoldan pishilgen sapasy sanıtarlyq talaptarǵa saı qorǵanysh kıimderin tigýmen «Ramıt-Aktaý» JShS men «Eńbek-Atyraý» mekemesindegi 32 jazasyn óteýshi aınalysyp, az ýaqyt ishinde 50 myń birrettik qoldanysqa jaramdy qorǵanysh kıimderin, 60 myń betperde tigip, sondaı-aq 4 dezınfeksııalyq tonnel daıyndap shyǵardy.
– Jalpy, vırýstyq ınfeksııadan qorǵaný kostıýmderin qaýipsizdigi barynsha joǵary túzeý mekemesinde jazasyn óteýshiler Mańǵystaý óńirinde karantın rejimi jarııalanǵanǵa deıin tige bastaǵan bolatyn. 32 sottalýshy jumys kestesine saı táýligine birneshe kostıým piship shyǵarýda. Olar zań júzinde turaqty qyzmetke tartylǵan. Eńbegi úshin aıyna 42 500 teńge kóleminde jalaqy alady degen bolatyn atalǵan mekemeniń qyzmetkeri Roman Telenkov. Onyń aıtýynsha, Aqtaýda pishilip shyǵarylǵan qorǵanysh kıimderi birinshi kezekte jergilikti densaýlyq saqtaý mekemeleriniń qyzmetkerleri úshin jeke qorǵanysh quraly esebinde satylǵan jáne dárigerlerden bólek qyzmetkerleriniń qaýipsizdigin oılaǵan basqa da mekemeler suranys bergen. Birrettik qorǵanysh kıimderiniń naryqtaǵy quny 1 500 teńgege baǵalanǵan.
«Jaqsynyń jaqsylyǵyn aıt – nury tasysyn» degendeı, Mańǵystaý oblysynyń ákimi S.Trumov karantın kezinde el qaýipsizdigin qamtamasyz etýge, sol arqyly indettiń odan ári taralmaýyna óz úlesterin qosqan sottalýshylardy alǵys hatpen marapattady.
Aımaq basshysy sottalǵandarǵa quttyqtaý lebizinde koronavırýspen kúrestiń barlyq el úshin mańyzdy synaq bolǵanyn, bas bostandyǵynan aıyrylǵandardyń da qıyn kezde kúrestiń aldyńǵy shebinde júrgenderi úshin arnaıy qorǵanysh kıimderin daıyndap úlken úlesterin qosqandaryn atap ótti.
– Sottalǵandar da – qoǵamnyń múshesi, elimizdiń azamaty. Sondyqtan olardyń el ómirine, otandastarymyz tap bolǵan qıyn jaǵdaıǵa beıjaı qaraı almaıtyny anyq. Myńdaǵan kıimder tigip, qoljetimdi baǵamen usynǵan olardyń eńbegi joǵary baǵalaýǵa laıyq. Mańǵystaý oblysynyń ákimi Serikbaı О́telgenulynyń alǵys haty jazasyn óteýshiler úshin beıbit, azamattyq ómirge degen kózqarastarynyń túzelýine, oń tárbıe sapasyn boıyna sińirip, ózin ózi túzeýine óz áserin bermek. Sonymen qatar sot oryndary olardy merziminen buryn bosatý kezinde atalǵan alǵys hatty nazaryna alatyn bolady, deıdi IIM QAJ komıteti Mańǵystaý oblysy boıynsha departamenti bastyǵy orynbasarynyń mindetin atqarýshy ádilet podpolkovnıgi, zań ǵylymdarynyń magıstri Qanat Jarylǵapov.
Eńbekteri elenip, aımaq basshysynyń alǵysyna bólengen jazasyn óteýshiler el úshin eńbek etýge múmkindik bergen mekeme ákimshiligine rızashylyqtaryn jetkizdi. Keshe jaza basqanymen, búgin jurtyna jaqsylyq etken olardyń qýanyshty sátterine qarap erkindikke shyqqan soń da talaı jaqsylyqtardyń jarshysy bolsa ǵoı degen tilekte boldyq.
Mańǵystaý oblysy
