Bul týraly atalmysh eldiń barlyq buqaralyq aqparat quraldary jarysa jazyp jatyr. Sonyń ishinde SP Falcons FC saıty "Mońǵolııa fýtbol tarıhynda maýsymaralyq transferdiń jańa rekordy ornady" dep jahanǵa jar salýda. Naqtyraq aıtqanda, jýyqta joǵarǵy lıgada óner kórsetetin komandalar arasynda jyl saıyn ótetin dástúrli aýys-túıis kezinde Deren klýbynyń shabýylshysy Janserikti SP Falkons komandasy 20 mıllıon mońǵol aqshasyna satyp alǵan.
Bundaı saýda joǵaryda aıtqanymyzdaı Shyńǵyshan eliniń aıaqdopshylar tarıhynda buryn-sońdy bolmaǵan. Ashyqyraq aıtqanda, bundaı baǵany eshkim satylyp kórmegen. Sóıtip, Janserik baýyrymyz jańa komandanyń 7-shi nómirli jeıdesin kıgen eken.
Oqyrmandar aıtatyn shyǵar: "Mońǵol fýtboly maqtanarlyq deńgeıde emes", dep ol ras. Mysaly, Mońǵoldyń ulttyq quramasy FIFA toqtatqan álemdik reıtıngide 210 memleket arasynan 190-shy orynǵa jaıǵasypty. Biraq atam qazaqtyń "Jarlyny jarly demeńiz, jarly baıǵa teńeler" degeni sııaqty bir kúni bulardyń da juldyzy janatyn shyǵar. Kim bilsin.
Sóıte tura mundaǵy fýtboldyń komandalyq oıyn júıesi joǵarǵy jáne birinshi, ekinshi lıgalardan turady. Munda barlyǵy 25 klýb bar. Bulardyń arnasynan joǵarǵy lıgada 10 komanda oınaıdy. Janserik inimiz sońǵy 6 jyldan beri joǵarǵy lıgada óner kórsetip júr. Sonymen qatar, eldiń ulttyq quramasy sapynan oıyp turyp oryn alǵan. Tipti ótken 2019 jyly "Úzdik shabýylshy" ataǵyn qınalmaı qanjyǵalaǵan eken.
"Tulparǵa da bir tomar" degendeı baýyrymyz 1999 jyly 5 sáýir kúni Ulan-batyr qalasynda ómirge kelgendikten ana tiline tym shorqaq kórindi. Onyń ústine ákeden erte aıyrylǵan. Býyny bekimeı jatyp, taǵdyrdyń san qıly synaǵyn bastan ótkerip de úlgeripti. Fýtboldan ulttyq qurama sportshylary jaıly anyqtamalyqta: pozısııasy – shabýylshy, boıynyń bıiktigi – 176 sm, salmaǵy – 64 keli t.b. delinipti. Fýtboldy 2008 jyly 9 jasynda Deren klýbynyń akademııasynda bastap, 16 jasynda ulttyq qurama sapyna alynyp, sodan beri joǵary lıgada dop teýip júr.
Baýyrymyzben telefon arqyly tileskenimizde, fýtbol oınaýmen qatar Ulan-batyrdaǵy Ulttyq ýnversıtette oqyp júrgenin aıtyp qaldy. "Atameken Qazaqstanyńdy kelip kórmeısiń be?" degen bizdiń ótinish-suraǵymyzda: "Ol meniń tiridegi armanym", dep qysqa qaıyrdy.
