Keshe qýanyshty habar jetti. 14 jastaǵy qazaqstandyq mánerlep syrǵanaýshy Elızabet Tursynbaeva 2014 jylǵy aqpan aıynda Sochıde ótetin XXII Qysqy Olımpııa oıyndarynyń kórsetilim synaǵyna qatysatyn bolypty.
Biz Lıza týraly alǵash ret budan 2 jylǵa jýyq ýaqyt buryn, 2011 jylǵy jeltoqsan aıynda, ol Germanııanyń Dortmýnd qalasynda jasóspirimder arasynda bolyp ótken halyqaralyq týrnırde qola júlde jeńip alǵan kezde jazǵanbyz.
Keshe qýanyshty habar jetti. 14 jastaǵy qazaqstandyq mánerlep syrǵanaýshy Elızabet Tursynbaeva 2014 jylǵy aqpan aıynda Sochıde ótetin XXII Qysqy Olımpııa oıyndarynyń kórsetilim synaǵyna qatysatyn bolypty.
Biz Lıza týraly alǵash ret budan 2 jylǵa jýyq ýaqyt buryn, 2011 jylǵy jeltoqsan aıynda, ol Germanııanyń Dortmýnd qalasynda jasóspirimder arasynda bolyp ótken halyqaralyq týrnırde qola júlde jeńip alǵan kezde jazǵanbyz. Sol joly 11 jasar qyzdyń Qyzylorda oblysyndaǵy Aral qalasynyń týmasy ekenin de baıandaǵan edik. Lıza bala jasynan sportqa, sonyń ishinde mánerlep syrǵanaýǵa qyzyǵyp ósipti. Qyzynyń osyndaı yntasyn bilgen ákesi Baıtaq Tursynbaev Máskeý qalasyna kóship barady. Onyń Lızadan jasy úlken Tımýr atty uly da bar eken. Qazir tórt adamnan turatyn otbasy Reseı astanasynda turyp jatyr.
«Meniń qyzym 14-ke endi ǵana tolatyn bolǵandyqtan, Olımpııa oıyndarynyń mánerlep syrǵanaýdan eresekter arasynda ótetin negizgi jarysyna jiberilgen joq. Sondyqtan ol munda tek kórsetilim synaǵyna qatysady», – dep túsindirdi Elızabettiń ári menedjeri bolyp tabylatyn ákesi Baıtaq.
Onyń aıtýyna qaraǵanda, Lıza qazir aldaǵy jeltoqsan aıynyń 5-i men 8-i aralyǵynda Japonııada ótetin jasóspirimderdiń álemdik Gran-prıiniń fınalyna daıyndalyp jatqan kórinedi. Eske sala keteıik, ol osy Gran-prıdiń taıaýda Mınskide ótken kezekti kezeńinde ekinshi orynnan kóringen edi.
Elızabet Tursynbaeva – jasóspirimderdiń 2013-2014 jyldarǵy maýsymǵa arnalǵan álemdik Gran-prıiniń 5 kezeńiniń qorytyndysy boıynsha alǵashqy úshtiktiń quramyna endi. Ol sondaı-aq Reseı úzdik jasóspirimderiniń «top-5» sheńberinen de oryn alǵan. Buǵan deıin, ıaǵnı 2010, 2011 jáne 2012 jyldary Qazaqstannyń chempıony atanyp úlgergen aıdyndy Araldyń aqbotasy bıylǵy 2013 jyly Máskeý qalasynyń birinshiliginde de aldyna jan salmapty.
Bir ǵajaby, talantty qyz tek mánerlep syrǵanaýmen ǵana shektelip qalmaǵan eken. Ol bos ýaqytynda, sondaı-aq, skrıpkamen jáne fortepıanomen shuǵyldanatyn bolyp shyqty. Jaqynda mýzykalyq mekteptiń skrıpka synybyn támamdap shyqpaqshy. Degenmen, ol óziniń negizgi armandaryn sportpen baılanystyra qarastyrady. Lıza mánerlep syrǵanaýdan Olımpııa oıyndary men álem chempıony bolýdy armandaıdy.
Aıta ketý kerek, ústimizdegi jyly «Samuryq-Qazyna» aksıonerlik qoǵamynyń demeýshilik etýimen Lızaǵa birqatar jarystarǵa qatysý múmkindigi jasaldy. Al jyldyń sońynan bastap ony Kanada jattyqtyrýshysy Braın Orser daıarlaı bastaıtyn bolady.
Serik PIRNAZAR,
«Egemen Qazaqstan».
