Jazýshynyń jary

Esse

Qazaq rýhanı ále­mindegi nebir maıtalman tulǵalardyń kóptegen tabystary olardyń shańy­raqtaryndaǵy otan­a­sy­nyń kisiligine tikeleı baı­lanysty bolyp keledi. On­daı apalarymyzdyń óz eńbekterin mindetsinbeı, baı­­qaýsyz kúıde, qalta­rysta qal­ǵandy jón kóre­tini taǵy bar.

Bul jolǵy keıipkerim − Qyzdarkúl Pernebaıqyzy, jazýshy Marhabat Baıǵut­tyń jan jary.

Esse

Qazaq rýhanı ále­mindegi nebir maıtalman tulǵalardyń kóptegen tabystary olardyń shańy­raqtaryndaǵy otan­a­sy­nyń kisiligine tikeleı baı­lanysty bolyp keledi. On­daı apalarymyzdyń óz eńbekterin mindetsinbeı, baı­­qaýsyz kúıde, qalta­rysta qal­ǵandy jón kóre­tini taǵy bar.

Bul jolǵy keıipkerim − Qyzdarkúl Pernebaıqyzy, jazýshy Marhabat Baıǵut­tyń jan jary.Jazýshy aǵamyz erkeletip «Qyzdan» dep qoıady. Ol kisimen alǵashqy ushyrasýym áli kúnge esimde. «Lenınshil jasta» jumys istep júrgen kezim bolatyn. Shymkent shaharyna je­ke sharýammen kelgenimdi aıtqan edim. Mahań: «Úıge júrip, jeńgeńizdiń qolynan dám tatyńyz», – dedi birden. «Demek, aǵamyzdyń jary jomart jan eken ǵoı...», –degendeı oı qylań berdi mıymda. Bes qabatty úıdiń podezine attap kirgenimiz de sol edi. Rııasyz jymıǵan kúıde bir kelinshek baspal­daqpen jaılap túsip kele jatty. Jymıǵanda da týra maǵan qarap jymııady. Mahań «á» dep aýzyn ashyp ta úlgermegen edi. Álgi kisi maǵan taqap kelip, erekshe jylylyqpen: «At-kólik aman-esen jettiń be, aınalaıyn!», − dedi de mańdaıymnan súıdi. «Bizdiń úıdegi jeńgeńiz», − degen sózder sodan keıin ǵana qu­la­ǵyma shalynyp jatty. Ashyq-jarqyn minezdi talaı apa-ápkelerimizdi kórgen sııaqty edim. Biraq mynaý qarsy alystyń jaıy múldem bólekshe edi.

– Aqlıma degen sińlińiz dál qazir úıde, qarsy alady. Men shamamen bes-on mınýtta kelip qalarmyn,− dedi de júgire basyp jónine ketti. Aıtsa aıtqandaı, úıdegi balalarmen tanysyp, amandasyp, dastarqanǵa jaı­ǵasqanymyz da sol edi. Qyzdan ápkemiz ile-shala kelip qaldy. Sóıtsek, istiń mán-jaıy bylaı eken.

Jazýshy aǵamyzdyń jaǵ­daıyn tolyq jasap, bala­lardyń tárbıesimen naqty túrde aınalysýdy óziniń eń basty paryzy ári sodan týyndaıtyn qorytyndylardy óz baqytynyń negizi dep oı túıgen Qyzdan ápkemiz, Shymkent qalasyna kóship keli­simen, otbasynyń turmys-tirshiligi úshin eń qolaıly degen jumysty izdeıdi. Onysy jáne tabyla ketedi. Dálirek aıtqanda, úıdiń qasyndaǵy poshta bólimshesinde jedelhattardy tasý qyzmeti. Kezekti jedelhatty shuǵyl túrde jetkizý kerektigi týraly qońyraý shalynsa bitti, ol kisi qustaı ushyp baryp, álgini ıesine tabys etip, qustaı ushyp úıine qaıta keledi. Ol úshin beriletin aılyǵynyń mardymsyz ekendigine de kóńil aýdaryp jatqan jeńgemiz joq. Eń bastysy – qolaıly da adal jumysty shańyraq sha­rýalarymen ushtastyra júrgizý. Aıta ketken jón bolar: Pernebaıqyzy mektepti oıdaǵydaı bitirgen. Aýyldyq kitaphanada on jyl istep, úzdik kitaphanashy atanǵan. Shymkentte kitaphanashylyq oryn tabylmaǵan. Sonaý Túl­kibastan oblys ortalyǵyna kóship kelip, balalarynyń buǵanasy qata bastaǵan tus­ta Mahańnyń: «Qyzdan, qala­ǵan oqýyńa syrttaı bolsa da túsip alsańshy! Bálkim, basqa jumysqa aýysqyń ke­ler?!», − degen tektes usy­nys­taryna: «Sizderdiń jaǵ­daılaryńyzdy jasap otyrýyma osy jumysym qolaıly. Basqa oqý bitirsem, soǵan saı qyzmet aýystyrǵym kelip, sizderdiń kúılerińiz ketip qalar. Ýaqytsha osy jumysta júre turaıyn», − dep yńǵaı bermegen kórinedi. Demek, óz ómirin otbasynyń baqytyna basybútin arnamaqty jón sanaǵan eken.

Qonaq retinde aspazdyq she­berligine min taǵa almaı men otyrmyn. Shaı ishpekke shaqy­rylǵanymdy, kóp bolsa, bir jarym saǵat buryn estigen shyǵar. Alaıda, aldymyzǵa kelip jatqan taǵamdar tizbegi quddy bir táýlik buryn habardar bolǵan jannyń tirligindeı. Bar júrek jylýymen, shyn yqylasymen ázirlegeni taǵamynyń ár túıirinen ańǵarylyp jatty. Qyzdan ápkemiz qonaq bólme men as úıdiń arasynda beınebir aıaǵynyń ushymen basyp, tipti qalyqtap júrgendeı áser qaldyrdy maǵan. Suıyq sorpa istemek bolyp qazan qulaǵyna jarmasqanymda, sońynan onyń qoıý tamaqqa aınalyp ketetini; birde tuzy kem, endi birde artyq bolatyny esime túsip, ishteı óz-ózimnen qysylyp-aq otyrmyn. «Qap, osydan barǵan soń aspazdyqtyń qyr-syrlaryna jaqsylap úńilmesem be?!», – dep, óz-ózimdi qaırap qoıamyn. Iаǵnı, ápkemiz bul salada, bir aýyz sóz qatpastan, maǵan ustaz bolyp otyr­dy.

Bizdiń tanystyǵymyz, soǵan jalǵas otbasylyq aralas-qura­lastyǵymyz órbigen sol bir keńestik dáýirde Marhabat aǵa Ba­ı­ǵut Qazaq­stan Jazýshylary odaǵynyń Oń­tústik oblystardaǵy bólimshesiniń basshysy bolatyn. Qolyna qalam ustaǵan aǵaıynnyń Ońtústik óńirge barǵysy kelip turatyny aqıqat edi. Sondaı kelýshilerdiń ishinde ózderine týǵan baýyrdaı bolyp ketken ári otbasy bolyp aralasatyn aqyn-jazýshylardy quraq usha qarsy alyp, Mahańnyń tutas otbasy bir jasap qalysatyn edi. «Aqyn-jazýshylardy úıge apara jatyrmyn. Jaǵdaıyń qalaı edi?» − deı tura, Jazýshylar bólimshesiniń bastyǵy telefon symynyń kelesi jaǵynan aıtylar jaýapty shamalap sezetin bolǵan-aý, sirá. «Er­tip kele berińiz. Bir mánisi bolar». Osylaı desimen, Qyzdarkúl ápkemiz qos bólmeniń arasynda balalarymen qosyla tapyraqtaı júgirisip, daıyndyqty bastaıdy da ketedi.

Kezi kelgende ótkir pikir­lerin qııýyn taýyp aıta alatyn, basyna shyqqysy kelgenderdi tabanda «bastapqy ornyna» túsire qoıatyn, aıarlyqtyń asqynǵan túr­lerine kezikken sátinde onyń ıesin utqyr sózderimen «kisendep tastaıtyn» jazýshynyń jary − másele Mahańnyń mártebesine kelip tirelgen kezde barynsha jumsaq ári jomart-aq. Osy bir qonaqjaı shańyraqqa otanasynyń uqyptylyǵy men únemshildiginiń qanshalyqty yrys-bereke bolyp daryǵanyn shamalaý qıyn emes. Rasynda, úıdegi árbir zattan jazýshynyń jarynyń alaqan jylýy sezilip turatyn. Shańyraqtaǵy kórpe-jastyqtan bastap, tereze perde, neshe túrli japqyshtar deısiz be, bári de Qyzdan ápkeniń shyǵarmashylyq eńbeginiń jemisi edi. Birin toqıdy, ekinshisin tigedi degendeı... О́zi aıtqandaı, aınalyp kelgende munyń bári de − Mahańnyń shańyraǵynyń berekeli de shýaqty bolýy úshin jasalǵan áreketter. Otaǵasynyń tapqan ár­bir tabysyn ekeý etý, uqsata bilý!

Sol alǵashqy tanysqan jazdyq demalysymda, ápkemiz Aqlıma ekeýmizdi Túlkibasqa ertip bardy. Bylaısha aıtqanda, beıresmı saparmen... Erli-zaıyptylardyń ekeýi de osy aýdannyń tól perzentteri bolǵandyqtan, ápkemiz óz jurtyn da, qaıyn jurtyn da armansyz aralatty. Bir shańyraqqa qona jatyp qonaq bolyp, ekinshi úıden tústik as ishsek, kelesi shańyraqtan bal tatyǵan qymyz iship sýsyndaımyz degendeı... Asa rıza bolǵanym, úı saıyn uqyptylyq, jınaqylyq, turmysqa óte beıimdilik ańǵarylyp jatty. Beınebir, Túlkibastyń sulý tabıǵatyna turǵyndarynyń yjdaǵatty turmys-tirshilikteri úılese ketkendeı. Jaratýshymyz jarylqaǵaı sondaı jurtty!

Kelesi baratyn úıimiz Keńes óki­meti kezinde «Vannovka» dep atalǵan, aýdan ortalyǵy túbindegi bir bólimshede eken. Jaıaý − alys emes. Jarty saǵat kóleminde jetip qalýymyz múmkin. Júrip kelemiz. Maýjyratar mamyr ótip, kún aptaby qyzdyrǵan maýsym kelip kirse de, Túlkibastyń quıqaly óńiri óziniń alabóten boıaýyn bermesten, erekshe tamyljyp tur edi.

«Ne degen keremet kún!

Janyńa bári daıar ne kerektiń:

Kórinedi gúlderdiń búr jar­ǵany,

Estiledi ushqany kóbelektiń.

Ne degen keremet kún!», –

dep Muqaǵalı aqyn jyr­la­ǵandaı, jan saraıyńdy ashar, tańǵy bir ýyz shaq bolatyn. Bir kezde qarasaq, ústine qatarlastyryp temir bósh­kelerdi qoıyp tastaǵan bir at arba ótip barady eken.

− Myna kisi bizdi ala ketpes pe eken?! − dep, aıtyp aýzymdy jı­ǵa­­nym­sha, tizgin ustap otyrǵan kisi «dyr-r-r» dep arbasyn toqtata qal­syn.

− Otyryńdar, qaraqtarym. Myna aýylǵa sút jınaýǵa bara ja­tyr edim. Ázirge júgim joq. Arba jeńil. Anaý oryndyqqa jaı­ǵasyńdar, − dedi aýyldardan sút jınaıtyn ata. Oryndyq degeni qap­taldata qaǵylǵan jińishke bir taqtaı eken.

− Qoı, mynaǵan otyramyz dep, arbanyń dóńgelegine túsip qa­larmyz. Odan da osy bóshkelerdiń ústine jaıǵaspaımyz ba?! − dedik te, dereý bir-bireýin ıemdenip, otyra qalystyq. Oıly-qyrly jerlermen júrgende arba edáýir sekekteıdi eken. Bos temir bóshkelermen birge biz de álsin-álsin «sekirýdemiz». Aýyl arbasyna shýlaı jabysa, japa-tarmaǵaı minip alatyn balalyq shaǵymyz oıymyzǵa oraldy-aý deımin. Ápkem ekeýmiz mázbiz.

− Dál qazir balalyq shaǵym esime túsip ketti, − dedi ol kisi jaýqazyn jyldaryna qaıta oralǵandaı bolǵan óziniń qazirgi keıpinen qysyla kúlimsirep. − Shaǵyn ǵana shelegim bolatyn. Sony bulaqtyń sýyna toltyryp alyp, shyr kóbelek aınala qýanýshy edim. Shelekti kóldeneń ustasam da, bir tamshy sýyn jerge tamyzbaǵanyma máz bolatynmyn. Sóıtsek, onyń syry fızıkalyq zańdylyqta jatyr eken ǵoı. Ony keıin mektepten bildim.

Osylaı áńgimelese otyryp biz Azattyq aýylyndaǵy Mahańdardyń óz qoldarymen turǵyzǵan alǵashqy úılerine bardyq. Úıdiń árbir kir­pishi derlik óz ıelerine bitken mal-múliktiń tabanaqy, mańdaı terimen kelgenin aıǵaqtap turǵandaı. Jazǵy sákide otyrmyz. Bir kósheden keıin, aýyldy qaq jaryp, Shymkent pen Almatyny jalǵastyratyn kúre­tamyr jol ótedi. Álsin-álsin aýyr «Ikarýs» avtobýstarynyń toqtap baryp, júrisin jalǵastyrǵan ysh­qynysty dybystary qulaqqa kelýde. Qyzdarkúl ápkem kúlimsirep alyp, kelesi áńgimesiniń shetin shyǵardy.

− Aǵań aýdanda biraz jyl jumys istep baryp, oblystyq «Ońtústik Qazaqstan» gazetine qyzmetke aýysqan edi ǵoı. «Balalardy jaldamaly páterden páterge kóshirip, sandaltpaıyn», − dep gazetten otbasymyzǵa páter berilgenge de­ıin, bes jyl Shymkentten qaty­nap jumys istedi. Dúısenbide, jumysyna keshikpeýdi oılap, tań alakeýimnen jolǵa shyǵady. Jumanyń qoıý qarańǵysynda qaıta qaýyshamyz. Sondaǵy bir qyzyq jaıtty aıtaıyn ba? − dep, ol kisi áýeli qysyla bir kúlip aldy. − Baǵana baıqaǵan shyǵarsyń, álgi úlken joldyń bizdiń úıge ókpe tusynda aıaldama bar. Árbir jarty saǵat saıyn PAZık avtobýsy toqtap, jolaýshylaryn túsirgen soń, júrisin jalǵastyryp jatatyn. Sonda aýladaǵy ushy-qıyrsyz jumystarymdy atqara júrip, jumanyń keshinde toqtaı ótip jatqan avtobýstarǵa bar zeıinimmen qulaq túre júrýshi edim. Senesiń be, sonda men Mahańnyń qaı avtobýstan túskenin kóliktiń toqtaǵan úninen tanıtyndaı edim. «Osy jolǵysynan tústi», − deımin óz-ózime. Jeti-segiz mınýttan keıin jymııa basyp, kirip kele jatady aýlaǵa. Múmkin, Alla solaı sezdirip qoıǵan shyǵar maǵan... Ol kisiniń árbir kelisi keremet mereke bolatyn bizge. Balalarynyń qýanǵanyn kórseń! Sóıtip, juma saıyn jol qaraı, kútip júretinbiz. Saǵynysh degen jaqsy eken ǵoı. Kisini jańǵyrtady, tazartady...

Mahańdardyń otbasy úshin Azattyq – erekshe meken. Ol – Qyz­darkúl Pernebaıqyzynyń ósken aýy­ly, erli-zaıyptylyq ómirleriniń bastaý alǵan besigi. Jáne... Qyzdarkúl ananyń búkil jan dúnıe, bolmysymen Haqty tanýǵa betburysty qadam jasaǵan jeri. Naqtylaı aıtqanda, «Týǵan jerge týyńdy tik!», − degen maqsatpen, Azattyqtaǵy osynaý otaý úılerine úlken uldary Baýbekti otbasymen qonystandyrǵanyn, ádebıet páni muǵaliminiń ózi aralasqan ortalarda tereń ıman, adal eńbek, kórkem minezimen aıryqsha syıly da súıkimdi bola bilgenin, sodan keıin, ıá-ıá, sodan keıin... qapyda mert bolǵanyn jazýshy aǵamyz óz shyǵarmalarynda jan-jaqty jáne tereń túrde talaı ret qamtyǵan bolatyn. Kóldeneń kók attydan da qolynan kelgen kómegin aıamaı, jaýynan da jaqsylyq kútip turatyn osy bir pák nıetti jannyń qazasy ony sál ǵana bilgenderdiń ózine de asa aýyr tıgen edi. Syrt adamdardyń ózine solaı bolǵanda, týǵan ananyń sondaǵy jaıyn eles­tete berińiz... Qyzdarkúl ápkemiz osyndaı sátte óz basynan qandaı jaılardy keshirgenin keıinirek maǵan syr etip baıandaǵan edi.

– Alǵash estigende, opyrylyp túskendeı boldym... Daýys shyǵaryp endi jylaı berem degende, esimnen tanyp bara jatyr ekenmin. Sabyrǵa kelý kerek ekenin uǵyndym. «Lá ıláha ıllállah, Lá ıláha ıllállah!», − dep júretin jandardyń qatarynanbyz ǵoı. Burynnan-aq. Baýbegimdi shyǵarar kúni osy kálıma sózderdi sekýnd saıyn qaıtalaýmen boldym. Álsin-álsin talmaýsyrap, ózimdi-ózim joǵaltyp ala jazdaımyn. Keıde jylaı da almaı, únim de shyqpaı qalamyn. Esil-dertimniń bári «Lá ıláha ıllállahqa» aýyp ketkendeı. Onsyz da burynnan: «Alla!» dep, Mahańnyń ákelgen sharıǵat kitaptaryn oqyp júrýshi edim. Sol joly bir nárseni anyq túsindim. Adamnyń ómiri de, ólimi de, taǵdyry da..., bári-bári bir Allanyń qolyndaǵy is eken. Qazir de ulym esime túskende kóz jasym óz-ózinen tógilip ketedi. Bul tek − saǵynǵanymnyń belgisi. Allanyń jazýyna, pármenine qarsylyǵym emes. Islam týraly buryn oqyǵan kitaptaryma qaıtadan den qoıa bas­tadym. Burynǵydaı emes, bir Allanyń bizge buıyrǵandaryn jete túsine bastaǵan sııaqtymyn. Birtindep namazǵa keldim...

Sodan keıingi jyldary bir kezdeskenimizde Qyzdan ápkemiz:

− Taǵy bir aıtpaǵym, kelinim Aqbópege eki dúnıede de rızamyn. Ekeýi bir-birin shyn súıip edi. Tútinin tútetip, «Baýbektiń shańyraǵy» degizip otyr. Shúkir, Baýbegimniń sońynda tuıaqtary qaldy. Endi, solar aman bolsyn, dep, Alladan myń jalbaryna tileımin! − degen bolatyn.

Shynaıy hadısterde aıtyl­ǵanyndaı, bir Allaǵa ıman keltirip, namazdaryn oqyp, Orazasyn ustap, zeketi men sadaqasyn bergen ári kúıeýi dúnıeden óter-ótkenshe oǵan rıza bolǵan áıeldiń barar jeri Jumaq eken. Alla bizdiń búgingi keıipkerimizge de máńgiliktiń sondaı baqytyn násip etkeı.

Bir joly, ázilge bura otyryp, jazýshy aǵamyzdan kitaphanashy qyzdy qolyna qalaı «qondyra» alǵanyn suraǵan edim.

− Qyzdannyń kóshesinen kúnde ótetin edim. Úıime qaraı, árıne. Kózimniń astymen urlana qarap qoıamyn. Ol qazan-oshaq pen úıi arasynda júgire basyp, tirlikterin atqaryp júredi. Biraq, birde-bir ret kóshe jaqqa tym bolmasa kóz qıyǵyn salyp ta qaramaıtyn. Jasyratyn nesi bar, bul qylyǵy meni erekshe qyzyqtyrdy. Árli-berli ótýimdi burynǵysynan da jıilettim. Moıyn burar emes. Sodan keıin, «táýekel» dep, úshbý hat joldadym. «Hatty jazǵan kim eken?», − degendeı, sál kóz qıyǵymen qaraǵany da sol edi, uzaq oılanýǵa murshasyn keltirmesten úıge kelin qylyp túsirdim, − dep, sál-pál ázilge bura otyryp, shyndyqty moıyndaǵan bolatyn.

− Sol kezdegi beıkúná kitap­hanashy qyz «Kórpesaıdyń kitap­hanasy» áńgimeńizdegi Zakon shal­dyń japon qyzynyń prototıpi bolǵan-aý, shamasy.

− Birinde az, kelesisinde kópteý dárejede biraz shyǵarmamyzda kórinis beredi ápkeńizdiń qylyq­tary.

− Keıbir shy­ǵarma­la­ryńyzda ja­zýshynyń jary, Shym­kentshe aıtqanda, «júdá» adýyndy ǵoı.

− Sol shyǵarmalarymnan Qyz­dannyń obrazyn jasap alǵan biraz oqyr­mandarymnyń bul kisi­niń ózin kórgende: «Múmkin emes, múmkin emes, men bas­qasha elestetip edim», − dep bas shaıqap jatatyny bar.

− Sondaı kezdegi ápkemizdiń «reaksııasy» qandaı bolady?

− Ápkeńiz máz bolyp, kúle beredi. «Otrısatelnyı» geroı bolsa da, áıteýir meniń qalam ushy­ma iliný unaıdy-aý deımin ózine. Al, shynyn aıtsam, áıelder «obrazyndaǵy» adýyndy minez shtrıh­taryn basqa zaman­dastarymyzdyń bolmysynan da terip ala be­rem, – dedi Mahań jymııa.

Sońǵy bir ázirde sá­­lem­de­se barǵanymda Qyz­­darkúl ápke:

− Qarap otyrsam, ýa­qyt óz degenin isteıdi eken. Qazir kúsh-qaı­ratym burynǵydaı emes. О́ziń bilesiń, bur­naǵy jyldarǵa deıin aǵańnyń kindik qany tamǵan Pistelisine baryp, baqsha salyp, aǵańa dep taza ónim­derimizden bankiler jaýyp alýshy edim ǵoı. Ondaı zaman menen qaldy bilem, − dep, «muńyn» shaqqan edi. Solaı deı tura, ornynan turyp baryp, jazdyq sákini aınaldyra óz qolymen egip tastaǵan raıhany men jalbyzy aralas, neshe túrli jupar ıisti ósimdikterge álsin-álsin sý búrkip, árli-berli terbep qoıady. Sol sát janǵa jaıly bir jupar ıis qolqańyzdy tazalaı ótip, tutas aǵzańyzdy rahat bir kúıge bóleıtindeı.

– Ápke, «syrly aıaqtyń syry ketse de, syny ketpeıdi» degen ǵoı. Áli de bolsa, syny­ńyz sol qalpynda sııaqty. Jupar ıisti ósimdikterińiz «izińizden qalmaı» áli júr eken, − dep, men de ázildep qoıar emespin.

Kóbinese, biz qalam­ger­lerdiń shyǵarmashylyq tabys­tary jaıly sóz qozǵaımyz da, onyń naǵyz «tyly», ıaǵnı sizdi san-qıly rýhanı tolǵanystarǵa túsirgen shyǵarmalardyń jazylýyna jaǵdaı jasap, jazýshyńyzǵa óz turǵysynan dem berip júrgen qaltarystaǵy názik bolmysty jandar jaıly oılaı bermeımiz. О́kinishti-aq!

Qazaq rýhanııatynyń Qunanbaıdaı asqaryn bar yqylasymen tereń túsinip, onyń jan serigi bola bilgen Uljan sııaqty tekti analarymyz jaıly tek qaǵaz júzinde oqyp, bilgen edik. Al, ózimiz kózin kórip, bir zaman aýqymynda qatar ómir súrgen Márııam Muqankelini sııaqty aıaýly apalarymyzdan bastap, talaı-talaı syralǵy jeńgelerimizdiń óz jubaılaryn tóredeı kútip, qalamgerdiń shyǵar­mashylyq shabytty shaq­tarynda ol kisilerge aıaqta­rynyń ushymen basyp, qyzmet etken sátteri, aınalyp kelgende, dúıim qazaq rýhanııatyna qaltarysta júrip qosqan úlesteri emes pe?! Eske túsirer bolsaq, «Qazaq ádebıeti men óne­ri» degen úlken otaýda izet­pen qyzmet etken ondaı kelinderdiń sany, tize berse, qomaqtylaý birneshe jınaqqa júk bolǵandaı. Biz búgin Qyz­darkúl Per­nebaıqyzy jaıly sóz qozǵaı otyryp, Astanadan shalǵaıda ǵumyr keship, rýhanııatymyzdyń otymen kirip, kúlimen shyǵýdy ózderine asa zor baqyt sanaǵan aıaýly apalarymyz ben jeńgelerimizdiń jıyntyq beınesin som­damaqqa talpynys ja­sadyq.

Alla razylyǵy úshin jasalǵan jaqsylyqtardyń eskerýsiz qalatyny bolmaıdy eken. Endeshe, bul fánıde bolmasa, kelesi shynaıy ómirlerinde atalǵan isteri aldarynan zor saýapty amaldary bolyp jolyqqaı! Qos dúnıeleri de qaıyrly bolǵaı!

Nurlytaı ÚRKIMBAI.

ShYMKENT.