Taǵdyr qıyndyǵy men synaǵyn qaısarlyqpen jeńip, adal eńbekpen ómir súre bilgen mundaı jandardy jurt aıryqsha qadirlep, baǵalaıdy. Biraq ómir degenińiz ejelden jumbaǵy jumyr tylsym álem desek, keıde saıyn dalanyń saǵymyndaı buldyrap, synaptaı qubylyp, kóńilge ala bult úıiriltip, japyraǵy jelge tonalǵan kúzgi baqtyń keıpin eske salady. Kez kelgen qazaq qarııasy úshin otbasy, aǵaıyn-týys pen dos-jarannyń ortasynda syıly bolý, tórden túspeı, syıyn ketirmeı, ádemi qartaıý baqytqa balanady. Biraq qarttarymyzdyń bári birdeı shat-shadyman ómir súrip, júzderinde qýanyshtyń nury shalqyp tur dep aıta alamyz ba? Jahandaný jalyny sharpyǵan zamanda jasy úlkenderdiń aqyl-keńesine qulaq túrip, qurmet kórsetpek turmaq kereksiz qylyp barady.
Biz materıaldyq jaǵdaı ústemdik qurǵan qoǵamda ómir súrip jatyrmyz. Qart adam úıde syıly bolýy úshin onyń zeınetaqy alýy mańyzdy sanalady. Sondyqtan búginde adamdy jasyna qaraı emes, bergen asyna qarap baǵalaý beleń alyp ketti. Qazaqstandaǵy Statıstıka komıtetiniń málimetine sensek, jasy 60-65-ten asqan adamdar sany jyldan-jylǵa artyp keledi eken. Al ómir súrý jasynyń ortasha uzaqtyǵy – 69 jas. Al álemde eń uzaq ómir súrý jaǵynan Shveısarııa halqy alda tur. Onda ómir súrý uzaqtyǵy – 82-83 jas, soǵan qaramastan zeınetkerlikke áıelder – 64, er adamdar 65 jasynda shyǵady. 60-tan asqandar sany memlekettiń 23 paıyzyn quraıtyn kórinedi. Halyqaralyq zertteýler Islandııa, Ispanııa, Fransııa, Italııa, Aýstralııa, Norvegııa, Izraıl elderinde ómir súrý uzaqtyǵy 81-82 jas ekenin kórsetedi. Budan shyǵar qorytyndy, el mádenıetiniń deńgeıi qarttarǵa jasalǵan qamqorlyqpen, adam jasynyń uzaqtyǵymen ólshenedi degen sóz.
Adam oıy tym shapshań: quıyndaı ushyryp, qıyrdy sharlaıdy. Mundaıda, árıne, kóbine estigen áńgimeńnen góri, óziń kýá bolyp júrgen jaıtty alǵa tartýdyń qısyndy túıiletini túsinikti. Jaqynda aýladaǵy qoqys jáshikterden qaǵaz qorap pen temir-tersek terip júrgen zeınetkerdi jolyqtyryp qalǵanymyz bar. Ony jurt syrttaı «arba súıretken apa» dep ataıdy. Ústindegi kıimine, tazalyǵyna, belinen eppen býylyp, arbaǵa óte muqııat tıelgen qaǵaz qoraptaryna qaraǵanda qoqys jaǵalap qorlanatyn miskin janǵa uqsaı bermeıdi. Sonda shúıkedeı qart ne úshin bulaı jantalasyp júr? Turmysy tómen otbasylar men kembaǵal jandarǵa Úkimet tarapynan kóńil bólinip, kómek berilip jatqany da málim. Soǵan qaramastan turmys aýyrtpalyǵy ıyǵyna túsken mundaı qartań jandar týraly janaıqaı óte kóp. Tipti óńirlerden de osy taqylettes oqıǵalarǵa oraı dabyl qaǵylyp jatady. Kóshe boıynda qaıyr surap otyratyndary qanshama. Olardyń báriniń mundaı kúıge dýshar bolýynyń sebebin surastyryp, egjeı-tegjeıli bilý úshin kóp ýaqyt kerek. Alaıda bir-birine uqsamaıtyn osy sandaǵan taǵdyrdyń bárine ortaq bir másele bar. Ol – taǵy da sol qý aqsha, tapshylyq pen jetispeýshilik. Ádette zeınetkerlikke jetken jandardy qurmetti eńbek demalysyna shyqty dep dáriptep jatamyz. Qurmetti degen sóz qandaı qulaqqa jaǵymdy estiledi! Ol bir alańsyz keremet álem sekildi ózine asyqtyrady. О́kinishke qaraı, zeınetaqysy kúnkórisi men dári-dármegine jetpeı, amalsyz túrli jumysqa jegilip júrgen qıly taǵdyrlarmen betpe-bet júzdeskende kóńilińizdi kókjıekke ushyrǵan tátti sezimdi basqa oılar almastyryp, bul sózdiń maǵynasy áp-sátte basqasha sıpat alyp shyǵa keler edi. Biz áńgimege tartqan 83 jastaǵy Sara esimdi keıýananyń da qolda barǵa razy bolyp, shúkirlik etetin shaǵynda turmystyń tuńǵıyǵyna shógip, eńsesin tik ustaı almaı qalýy – joqshylyqtyń saldary.
– Keıde meshit pen bazardyń mańaıynda on eki múshesi saý adamdar alaqan jaıyp, qaıyr surap otyrady. Turmystyń aýyr taýqymeti jasytqan jandardyń taǵdyryn túsinemin. Bul úshin olardy jazǵyrý sóket bolar edi. Aıaq-qoly joq, jan baǵýǵa qaýqary jetpeıtin kemtar janǵa ókpe joq. Mundaı áreketke muqtajdyqtan barǵany anyq, al endi on eki múshesi saý bola turyp, kóshede alaqan jaıyp otyrǵan adamdardy túsinbeımin. Men nemerelerime mańdaı ter, taban aqymmen adal as jegizgim keledi. Jataqhananyń bir bólmeli páterinde qysylyp-qymtyrylyp 6-7 jan turyp jatyrmyz. Ulym – múgedek, kelinim de. Úsh nemerem mektepte oqıdy. Zeınetaqy, járdemaqy jetpeıdi. Sol sebepti qaǵaz qoraptyń ár kılosyn qabyldaý pýnktine on teńgeden ótkizemin. Byltyr 28 teńgeden edi. Bıyl baǵasy túsip ketti, – dep qamyǵady qamqorlyqqa zárý jan. Qarııalar máselesine «Qarttar kúni» ǵana kóńil bóletinimiz, osy kúndi syltaýratyp, maıda-shúıde syılyqpen kóńilderin aldarqatyp qoıatynymyz qandaı ókinishti. Musylmandyqqa júginsek, ósetin eldiń ónegeli urpaǵy «Úıdegi qarııań – jazyp qoıǵan hatpen teń» demekshi, qarııasy men keıýanasyn júregimen súıip, syılaýǵa árdaıym mindetti emes pe?!
