Oblystyq juqpaly aýrýlar aýrýhanasynyń arnaıy bólimderi, Aqtóbe medısınalyq ortalyǵynyń №2 juqpaly aýrýlar stasıonarynda jóndeý jumystary aıaqtaldy. Dál qazirgi jaǵdaıda oblystyq juqpaly aýrýlar aýrýhanasyndaǵy oryndar sany 275-ten 567-ge deıin, provızorlarda 430-dan 3336-ǵa deıin kóbeıtilip, oǵan taǵy da qosymsha oryndar ázirlendi. 1371 oryn ottegimen qamtyldy. Stasıonarlarda 395 ottegi konsentratory, 625 ottegi ballony, 381 ottegi jastyq bar. Lızıng arqyly 41 jedel járdem kóligi satyp alynatyn boldy.
Koronavırýs ınfeksııasyna qarsy daıyndyq jumystaryn pysyqtaǵan oblys ákimi Ońdasyn Orazalın aýdan ákimderi emdeý mekemeleriniń daıyndyǵyna jeke jaýapkershilik alatyndaryn eskertti.
«Aýdandyq aýrýhana men aýyldaǵy medısına bólimshelerindegi dári-dármek qoryn, qural-jabdyqtardyń jaramdylyǵyn tekserińizder. Jýyrda óńirde tumaýǵa qarsy ımmýndaý naýqany bastalǵanda, egýdi ımmýnıteti álsiz toptardan bastańyzdar. Sondaı-aq baqylaý toptarynyń da jumystaryn kúsheıtý kerek», dep atap ótti óńir basshysy.
Oblystyq densaýlyq saqtaý basqarmasy stasıonarlar men provızorlarda dári-dármek pen jeke qorǵanys zattarynyń úsh aılyq qory jınaqtalǵanyn habarlady. Epıdemııalyq jaǵdaı kúrt nasharlaıtyn bolsa, qalalyq emhanalar men aýrýhanalardyń medısına qyzmetkerleriniń qataryna M.Ospanov atyndaǵy Batys Qazaqstan medısına ýnıversıtetiniń professorlyq-oqytýshylyq quramy da qosylatyn boldy.
Osy kezge deıin óńirde karantın erejesin qadaǵalaıtyn 37 baqylaý toby jumys istedi. Monıtorıngtik top músheleri 827 ret karantın tártibiniń buzylǵanyn anyqtaǵan.
Aqtóbe oblysy
