Ǵ.Nadýevtiń aıtýynsha, túnde "Ystambul – Aqtaý" baǵytyndaǵy reıs Aqtaý halyqaralyq áýejaıyna qondy. Bortta 94 jolaýshy bolǵan. Anyqtamasy bar 83 jolaýshy úılerine qaıtaryldy. Al, 11 adam 1 shaǵyn aýdanda ornalasqan stasıonarǵa jatqyzyldy. Jolaýshylardan alynǵan kovıdke qarsy PTR test teris nátıje bergen jaǵdaıda úılerine jiberiledi.
"Búgingi tańda shetelden ushyp kelgen Qazaqstan azamaty bolsyn, basqa eldiń azamattary bolsyn bárine termometrııa ótkiziledi. Jáne de anketırovanııa ótedi. Sondyqtan da ol temir jol bolsyn, teńiz jolymen bolsyn, mashınamen kelip jatqan kisiler osyndaı qatań tekserispen esepke alynady", dedi Mańǵystaý oblysynyń Bas sanıtar dárigeri Ǵazız Nadýev.
Aqtaý áýejaıy ázirge tek halyqaralyq reısterden Ystambul-Aqtaý baǵytynda ǵana ushaqtar qabyldaýda. Áýe reısi aptasyna 3 ret qatynaıdy.
Eske sala keteıik, Bas sanıtarlyq dárigeri Erlan Qııasovtyń memlekettik shekaradaǵy ótkizý pýnkterinde koronavırýs ınfeksııasynyń aldyn alý sharalaryn odan ári kúsheıtý týraly jańa qaýlysy 6 qazanda saǵat 00:00-de kúshine endi. Jańa erejelerge sáıkes birqatar shekteýler qoldanylady. Qazaqstanǵa shetelden kelgen ushaq jolaýshylarynyń barlyǵy termometrııadan ótip, saýaldamaǵa jaýap beredi jáne COVID-19-ǵa qarsy PTR-testiniń oń nátıjesi týraly anyqtamany usynýy tıis. Qazaqstan Respýblıkasynyń memlekettik shekarasynan ótý kezinde 72 saǵattan aspaǵan anyqtama ǵana jaramdy. Sondaı-aq Qazaqstan azamattyǵy joq adamdarda anyqtama bolmaǵan jaǵdaıda olardyń elge kirýine tyıym salynady. Qolynda anyqtamasy bar jáne dene qyzýy qalypty jolaýshylarǵa COVID belgileri túsindirilip, sapardy jalǵastyrýyna ruqsat etiledi. Dene qyzýy joǵarylaǵan jolaýshylar qolynda anyqtamasynyń bolýyna qaramastan, karantındik stasıonarǵa eki kúnge jatqyzylyp, zerthanalyq tekserý júrgizý úshin oqshaýlanady. COVID-19 zerthanalyq zertteý nátıjesin alǵannan keıin testtiń oń nátıjesi bar adamdar juqpaly aýrýlar aýrýhanasyna aýystyrylady. Elge kelgen Qazaqstan azamattarynyń qolynda anyqtama bolmasa, 2 kún boıy karantındik stasıonarda oqshaýlanady.
