Keshe «Qazmedıa ortalyǵynda» Qazaqstannyń Ortalyq kommýnıkasııalyq qyzmetiniń uıymdastyrýymen elimizde júrgizilip jatqan ákimshilik reformalarǵa baılanysty brıfıng ótti.
Keshe «Qazmedıa ortalyǵynda» Qazaqstannyń Ortalyq kommýnıkasııalyq qyzmetiniń uıymdastyrýymen elimizde júrgizilip jatqan ákimshilik reformalarǵa baılanysty brıfıng ótti.
Oǵan Prezıdent Ákimshiligi Basshysynyń orynbasary Ǵabıdolla Ábdirahımov pen Memlekettik qyzmet isteri jónindegi agenttik tóraǵasy Álıhan Baımenov qatysyp, «Ákimshilik reformalar jáne jergilikti ózin ózi basqarý reformasy – 2013. Aldyn ala qorytyndylar» atty taqyrypta baıandama jasady.
Brıfıngte osy másele boıynsha aldymen Ǵ.Ábdirahımov sóz alyp, bıylǵy ákimshilik reformalardyń jumysyna óz baǵasyn berdi. Onda ol bıyl Elbasy N.Nazarbaevtyń bastamasymen ákimshilik reformalardy sapaly jáne tıisti deńgeıde júrgizý maqsatynda kóptegen is-sharalardyń atqarylǵanyn, sonyń ishindegi eń mańyzdysy «A» korpýsyna memlekettik qyzmetkerlerdi irikteý men aýyl ákimderin saılaýdyń bolǵanyn atap ótti. Sonymen birge, ol jergilikti basqarý organdaryn jetildirý maqsatynda istelgen jumystardyń mańyzdylyǵyn da atady.
«Bıyl «A» korpýsyna ótý úshin konkýrsqa 2024 úmitker qujat tapsyrsa, qazir sonyń 940-y kadr rezervine qabyldandy. Al jalpy qazir «A» korpýsy 539 laýazymdy qamtıdy. Bıylǵy konkýrsta kadr rezervine alynǵan kandıdattar testileý jáne áńgimelesý sııaqty eki kezeńnen turatyn irikteýden ótti. Olar Qazaqstan Respýblıkasynyń zańnamasy, memlekettik tildi bilý, logıkalyq kásibı quzyrettilik boıynsha test tapsyrdy», – dedi ol. Sondaı-aq, Ǵ.Ábdirahımov bıylǵy irikteýden ótken adamdardyń arasynda bıznespen aınalysqan azamattardyń da bar ekenin, al jalpy konkýrstyń nátıjesinde «A» korpýsy 30 paıyzǵa jańarǵanyn aıtty.
Kezdesýde aýyl ákimderin saılaýǵa baılanysty da Prezıdent Ákimshiligi Basshysynyń orynbasary biraz málimetter keltirdi. Onda ol aýyl ákimderin saılaýdyń ózi demokratııalyq synaq bolǵanyn atap ótti. Osy jerde Ǵ.Ábdirahımov saılaýdyń nátıjesinde aýyl ákimderiniń bilimi, biliktiligi óskenin, buryn 100-den astam aýyl ákimderiniń saıası bilimi bolmasa, qazir saılanǵan ákimderdiń barlyǵyna saıası saýatty, bilimdi, tájirıbeli, isker degen baǵasyn berdi. Sonymen birge, ol jańa saılanǵan ákimderge memleket tarapynan talaptyń da kúsheıtiletinin jetkizdi. Osyǵan baılanysty Ǵ.Ábdirahımov oblys ákimderi halyq aldynda jylyna bir ret esep berse, aýdan ákimderi eki ret, al aýyl ákimderi tórt ret esep beretinin aıtty. Munda ol ákimderdiń toqsan saıyn esep berýi aýyldyq jerde joldardyń salynýyna, mektepter men aýrýhanalardyń qurylysyna, basqa da áleýmettik nysandardyń jumysyna ákimniń der kezinde halyq aldynda jaýap berýi úshin jasalǵanymen túsindirdi.
Osydan keıin kezdesýde Memlekettik qyzmet isteri jónindegi agenttiktiń tóraǵasy Álıhan Baımenov elimizde memlekettik qyzmettiń sapasyn arttyrý boıynsha Elbasy N.Nazarbaevtyń tapsyrmasymen jumystar istelip jatqanyn, osynyń nátıjesinde bıyl memlekettik qyzmette «komandalyq kóship-qoný» 40-50 ese azaıǵanyn málimdedi.
– Konkýrstardyń rólin arttyrý úshin Prezıdenttiń tapsyrmasy boıynsha, aýysym tártibimen taǵaıyndaý, komandalyq dep atalatyn kóship-qonýdy azaıtý jańa zańnamamen júzege asa bastady. Nátıjesinde, eger byltyr toqsan saıyn 3,5 myń adam bir memlekettik organnan ekinshi memlekettik organǵa aýysymmen taǵaıyndalyp júrse, jańa zań kúshine engennen keıin orta eseppen ár toqsanda 70-80 adam taǵaıyndalatyn boldy, – dedi ol.
Sonymen birge, ol brıfıngte jaqynda Máskeýge baryp, Reseıdiń Memlekettik qyzmet akademııasynda magıstranttar men doktoranttarǵa elimizdiń memlekettik qyzmet úlgisi jóninde dáris oqyp, arnaıy semınar ótkizgenin atap ótti. Osy leksııalarda Á.Baımenov Reseıdiń jetekshi sarapshylarynyń «A» korpýsy jáne basqa da jańalyqtarymyz týraly áli bilmeıtinin aıtyp, bizdiń reformalarymyzǵa úlken qyzyǵýshylyq tanytqanyn jetkizdi.
– Reseıdiń jetekshi sarapshylary bizdiń reformalarǵa úlken qyzyǵýshylyq tanytty. Olar osynyń bári Elbasynyń saıası bastamasymen júzege asqanyn moıyndap otyr. Kezdesýde reseılikter men qazaqstandyq memlekettik qyzmet úlgisi nesimen erekshelenedi degende, eń aldymen, «A» korpýsy týraly aıtyp berdim. Odan da basqa jańalyqtardy aıttym, – dedi ol.
Dastan KENJALIN,
«Egemen Qazaqstan».
