Aýyldardy gazben qamtý jumystary jyl sońyna deıin aıaqtalady dep josparlanǵan. Al, turǵyndardy aýyzsýmen qamtý boıynsha 6 eldimekenge 2,7 mıllıard teńge bólingen. Endi sý qubyrlarynyń qurylysy aıaqtalsa, jergilikti halyqty ortalyqtandyrylǵan aýyzsýmen qamtý úlesi 78 paıyzǵa jetedi.
Sondaı-aq Qordaı aýdanynyń ákimi Rústem Dáýlettiń aıtýynsha, aýdandaǵy qaqtyǵystan keıin qalpyna keltirý jumystary qarqyndy júrgizilýde. Sonymen qatar, zardap shekken otbasylarǵa 40 mıllıon teńgeden astam tıisti áleýmettik jáne materıaldyq kómekter kórsetilgen. Búgingi tańda halyqty turǵyn úımen qamtamasyz etý máselesi de óte ózekti bolǵandyqtan, atalǵan máselege de jiti kóńil bólinýde. Jalpy, aýdan boıynsha 1524 azamat úı kezeginde tur. Al, 5 qabatty 5 úıdi jáne Qarakemer aýylyndaǵy 2 páterli 10 úıdi iske qosý esebinen 310 páter el ıgiligine beriletin bolady.
"Sondaı-aq baspanaǵa muqtaj az qamtylǵan jáne kópbalaly otbasylardy turǵyn úımen qamtamasyz etý maqsatynda asar jobasy aıasynda salynyp jatqan 15 úıdiń ishiýnde 9 úı tapsyryldy. Qalǵan 6 úı bıylǵy jeltoqsan aıynyń sońynda tapsyrylady", deıdi Rústem Dáýlet.
Búginde memleket qoldaýynyń nátıjesinde Qordaı aýdanynda barlyq salada ilgerileý bar. Bıyl aýdanda óndirilgen ónim 118,9 mıllıard teńge bolyp, ekonomıkalyq ósim 121,9 paıyzdy qurady. Al aýdandaǵy qurylys-jóndeý jumystaryna qatysty 392 jobaǵa 35,1 mıllıard teńge bólingen. Atalǵan jobalardy júzege asyrýdyń nátıjesinde 4630 jumys orny qurylǵan. Búginde barlyq jobanyń 38 nysanynda jumystar aıaqtalyp, 97 paıyzǵa jetken. Sonymen birge jer telimderine ınfraqurylym ıgilikterin ornatý boıynsha jalpy kólemi 2,6 mıllıard teńgege 7 joba iske asýda. Nátıjesinde aýdan ákimi Rústem Dáýlet aǵymdaǵy jyldyń sońyna deıin 1070 jer telimin kezektegi azamattarǵa berýge múmkindik týatynyn jetkizdi.
