Parlament Májilisi depýtattaryn saılaýdyń erekshelikteri men róline saraptamalyq talqylaý jasap, el azamattarynyń saıası mádenıetin arttyrý maqsatynda ótken dóńgelek ústelge qazaqstandyq ǵalymdar men sarapshylar qatysty.
Eýrazııalyq ıntegrasııa ınstıtýtynyń dırektory Erlan Saırovtyń aıtýynsha, elimiz parlamenttik saılaýdyń jaýapty kezeńine aıaq basty. Prezıdentimiz Qasym-Jomart Toqaevtyń bastamasymen ulttyq qoǵamdyq senim keńesi qurylyp, saıası reformalardyń alǵashqy paketi ázirlendi. Sonyń sheńberinde mıtıngiler týraly jańa zań kúshine endi. Budan basqa jeti zańnamalyq aktige ózgerister engizildi. Onda áıelder men jastardyń saılaý partııalyq tizimderine qatysýynyń 30%-dyq kvotasy bekitildi, saıası partııalardy tirkeý shegi 50%-ǵa tómendetildi. Alǵash ret parlamenttik oppozısııa ınstıtýty engizildi. Bul rette Qazaqstan – turaqsyz álemdegi turaqty memleket ekenin, al aldaǵy saılaý – eldiń evolıýsııalyq damý jolyndaǵy jáne azamattardyń saıası mádenıetiniń deńgeıin arttyrýdaǵy kelesi qadam ekenin este ustaǵan jón. Nátıjesinde barlyq saıası jumystar, sonyń ishinde saılaý jumysy qoǵam men azamattardyń birigýi jolynda jumys isteýi kerek.
– Álemde bolyp jatqan koronovırýs ınfeksııasyna qaramastan, elimizde áleýmettik salaǵa mán berilýde. Sońǵy tórt jylda Qazaqstanda 3 myńnan astam balabaqsha, 2 myńnan astam mektep salynǵan. Osyndaı ońdy ózgerister arqasynda halyqtyń bılikke degen senimi artyp keledi, – dedi Erlan Saırov.
Dóńgelek ústelde sóz alǵan Shyǵys Qazaqstan memlekettik ýnıversıtetiniń rektory Muhtar Tólegenniń pikirinshe, aldaǵy saılaý ádettegiden ózgeshe sheshim qabyldaıtyn kóshbasshy jastardy anyqtaıdy.
– Saılaý naýqany bastalǵanǵa deıin elimizdiń qoǵamdyq-saıası ómirine barlyq sanattaǵy azamattardyń qatysýyn arttyrý boıynsha sharalar júrgizildi. Bul proporsıonaldy model álemdik demokratııalyq tájirıbege tolyq sáıkes keledi, saıası júıeni nyǵaıtýǵa, demokratııany damytýǵa yqpal etedi, saıası partııalardyń qyzmetin jandandyrady. Aldaǵy saılaý osyǵan deıingilerdiń barlyǵynan erekshe. Onyń ereksheligi, úgit-nasıhatqa deıingi uzaq kezeń, ıaǵnı 51 kún, – dedi Muhtar Tólegen.
Al saıasattanýshy Qazbek Maıgeldınov Parlament Májilisi depýtattarynyń kezekti saılaýyna qatysty máseleler Nur-Sultan qalasynda ǵana emes, elimizdiń basqa aımaqtarynda, aýdandarda talqyǵa salynǵany durys ekenin alǵa tartady. Onyń aıtýynsha, 10 qańtarda bolatyn saılaý erekshe rejimde ótkizilmek. Olaı deıtini, bul saılaý koronavırýs pandemııasyna, álemdegi ekonomıkalyq daǵdarysqa tuspa-tus kelip otyr. Keıbir úmitkerler osyny paıdalanyp ádemi sózderdi, qurǵaq ýádelerdi úıip-tógýi de múmkin. Sondyqtan halyq tańdaý jasar kezde jan-jaqty oılanyp, óz tańdaýlaryn jasaýy tıis.
Sondaı-aq ózge de sarapshylar óz oılaryn ortaǵa saldy. Olardyń ishinde praımerızge qatysyp, irikteý synnan ótkender de boldy. Endeshe, saılaýdyń ár qazaqstandyq azamat úshin mańyzdy ekenin qaperimizde ustap, jaýapkershilik tanytqan abzal. Dóńgelek ústelde saılaý nátıjesi memlekettiń aldaǵy 5 jylyna tikeleı áser etetini de aıtyldy.
Shyǵys Qazaqstan oblysy
