Memleket qorǵaýyna alynǵan nysandar da konkı tebýge bola ma? degen suraqqa Ekologııa, geologııa jáne tabıǵı resýrstar mınıstrligi jaýap berdi.
Áleýmettik jelilerde týrıster men kásibı konkı tebýshilerdiń kólderde syrǵanap júrgen vıdeolary men sýretterin jıi baıqaýǵa bolady.
Ekologııa, geologııa jáne tabıǵı resýrstar mınıstrliginiń baspasóz qyzmeti Kólsaı kólinde konkı tebýge arnalǵan arnaıy jabdyqtalǵan alańdar joq ekenin eske saldy.
«Jeke tulǵalardyń muz ústinde bolýyna, sonyń ishinde konkı tebýge zańmen tyıym salynbaǵan. Kelýshiler tarapynan konkı tebýge degen suranystyń artýyna baılanysty jaqyn arada ulttyq park Kólsaıdyń tómengi jaǵyndaǵy kólde konkı tebýge arnalǵan oryn ashýdy qarastyryp jatyr. Al Qaıyńdy kólinde qaýipsizdikti qamtamasyz etý úshin muzǵa shyǵýǵa jáne syrǵanaýǵa qatań tyıym salynady. Tómengi jáne orta kólderde balyq aýlaýǵa ruqsat etiledi», dedi Ekologııa mınıstrliginiń baspasóz hatshysy Samal Ibraeva.
Kólsaı men Qaıyńdy kólderi Almaty oblysy Raıymbek aýdanynyń aýmaǵynda, Almatydan ońtústik-shyǵysqa qaraı 330 shaqyrym jerde ornalasqan.
Aıta keteıik, Úlken Almaty kólinde de konkı tebýge qatań tyıym salynǵan.
