Sozaq APB-ne jergilikti turǵyn alaıaqtyń qurbany bolǵandyǵy týraly aryz túsirgen. Jábirlenýshi áıeldiń aıtýynsha, syrttaı tanysy memleket tarapynan qaıtarymsyz nesıe alyp beremin dep senimine kirip, alaıaqtyq jolmen 4,5 mıllıon teńgeden astam aqshasyn zańsyz ıemdenip ketkenin kórsetken. Tártip saqshylar atalǵan jaıtty QR QK-niń 190-baby (Alaıaqtyq) boıynsha SDTBT-ǵa tirkep, qylmystyq isti birden bastap ketti.
Aryzdanýshylardyń shaǵymyna sáıkes, oryn alǵan alaıaqtyq qylmysyn ashyp, kúdiktini anyqtaý maqsatynda Sozaq APB-nyń tergeý bólimshesiniń qyzmetkerleri qajetti is-sharalardy júrgizdi. Tekserý jumystary nátıjesinde, polıseıler osy qylmysqa qatysty kúdiktini anyqtap, ony turǵylyqty meken-jaıynan ustady. Qazirgi tańda kúdikti jas áıel qamaýǵa alynyp, tergeý amaldary júrgizilýde.
Sondaı-aq APB bastyǵynyń tergeý jónindegi orynbasary Asylmurat Tursynbekov pen tergeýshi Dosjan Janseıt bastaǵan tergeý toby jan-jaqty jumys jasap, kúdiktige jasaǵan qylmysty moıyndatý úshin naqty aıǵaqtar men dálelder taýyp, árbir isti tereń ári tııanaqty zertteý nátıjesinde bul jaıt anyqtaldy. Sonymen qatar 50-den astam osyndaı jaıtqa qatystylyǵy anyqtaldy.
Tájirıbeli tergeýshiler kúdikti azamatshanyń jábirlenýshilerdiń árqaısysynan 350 myń teńgeden bastap, 4 550 000 teńgege deıin alaıaqtyq jolmen aqsha alyp júrgenin ashty. Olarǵa keltirilgen jalpy shyǵyn kólemi 80 mıllıon teńgeni qurap otyr. Qazirgi tańda tergeý bóliminiń qyzmetkerlerimen kúdiktiniń budan basqa da jaıttarǵa qatystylyǵy anyqtalýda.
Túrkistan oblysynyń polıseıleri oblys turǵyndaryna kez kelgen janǵa senbeýdi, alaıaqtyń arbaýyna túsip qalmaýdy eskertedi. Azamattarǵa ár túrli alaıaqtardyń aıla-amaldaryna túspeý úshin qyraǵy bolýdy usynady.
