Prezıdentke Qarýly Kúshterdiń qazirgi jaǵdaıy men áskerı daıyndyǵyn arttyrý sharalary týraly baıandaldy.
Qasym-Jomart Toqaevqa Qazaqstan armııasynyń zamanaýı qarý-jaraqtarmen jáne tehnıkamen jabdyqtalýy, ınfraqurylymdyq damýy, sıfrlandyrylýy, aqparattyq qaýipsizdiktiń qamtamasyz etilýi jáne bitimgershilik bólimderdiń daıyndyǵy jóninde málimet berildi.
Nurlan Ermekbaev damyǵan memleketter armııasynyń qurylymyna jasalǵan taldaý jumystaryn eskere otyryp, Qorǵanys mınıstrligi «Armııany jańǵyrtý» jobasyn usynatynyn habarlady. Ulttyq jobanyń júzege asyrylýy armııanyń áskerı áleýetin arttyrýǵa, belgili bir dárejede áleýmettik-ekonomıkalyq tıimdiligin qamtamasyz etýge zor múmkindik beredi.
Mınıstr Joǵarǵy Bas qolbasshynyń Áskerı maqsatqa arnalǵan aqparattyq-kommýnıkasııalyq ınfraqurylymnyń biryńǵaı operatoryn qurý jaıynda bergen tapsyrmalarynyń oryndalý barysy týraly esep berdi. Biryńǵaı operator áskerdi, resýrstardy basqarýdyń avtomattandyrylǵan júıesiniń úzdiksiz ári ornyqty jumys isteýin, sondaı-aq, aqparattyq qaýipsizdik talaptaryna saı keletin aqparattyq júıe men áskerı maqsatqa arnalǵan biryńǵaı transporttyq ortany qamtamasyz etedi.
Memleket basshysyna beıbitshilikti qoldaý operasııalaryna qatysatyn áskerı qyzmetshilerdiń daıyndyǵy týraly aqparat berildi. Nurlan Ermekbaevtyń aıtýynsha, Prezıdent Qasym-Jomart Toqaevtyń tapsyrmalaryn iske asyrý aıasynda BUU mıssııasy baǵytyndaǵy qyzmette meılinshe suranysqa ıe áskerı-medısınalyq, ınjenerlik, barlaý jáne áskerı polısııa sııaqty bólimderdiń daıyndyǵy pysyqtalýda.
Kezdesý qorytyndysy boıynsha Joǵarǵy Bas qolbasshy Qarýly Kúshterdiń áskerı áleýetin arttyrýǵa jáne qazirgi syn-qaterler men qaýipterdi eskere otyryp, olardy sapaly damytýǵa, armııany jabdyqtaýǵa, Qazaqstanda qarý-jaraqtyń birneshe túrin shyǵaratyn qorǵanys-ónerkásiptik keshenimen yqpaldastyq ornatýǵa, sondaı-aq, Qarýly Kúshterdi sıfrlandyrýǵa qatysty birqatar tapsyrma berdi.
Qasym-Jomart Toqaev birlesken oqý-jattyǵý jıyndaryn ótkizý jáne polıgondardy paıdalaný úshin ózge elderdiń áskerı vedomstvolarymen bitimgershilik qyzmet pen halyqaralyq yntymaqtastyqty keńeıtýdiń mańyzdylyǵyn atap ótti.
