Osynaý tusaýkeser aıasynda Memleket basshysynyń synyptastary jáne Qarasaı aýdanynan kelgen ustazdary men bir top aýyldastary ońtústik astana jurtshylyǵymen kezdesip, qýanyshty oqıǵaǵa oraı emen-jarqyn áńgime tıegi aǵytyldy. Negizinen alǵanda, bul kezdesý Nursultan Nazarbaevtyń orta mektepti bitirýiniń 55 jyldyǵyna arnalypty.
Osyndaǵy soǵys jáne eńbek ardagerlerine, basqa da meımandarǵa ásem bezendirilgen «Elbasy synyptastary» kitabynyń bir-bir danasy kózaıym etilip syıǵa tartyldy. Bir sholyp shyqqan adamnyń ózi-aq bul basylymnyń erekshe qundylyǵyna, baýrap alar tartymdylyǵy men mazmundylyǵyna birden nazar aýdaryp, kóz jetkizeri anyq.
Osynaý tusaýkeser aıasynda Memleket basshysynyń synyptastary jáne Qarasaı aýdanynan kelgen ustazdary men bir top aýyldastary ońtústik astana jurtshylyǵymen kezdesip, qýanyshty oqıǵaǵa oraı emen-jarqyn áńgime tıegi aǵytyldy. Negizinen alǵanda, bul kezdesý Nursultan Nazarbaevtyń orta mektepti bitirýiniń 55 jyldyǵyna arnalypty.
Osyndaǵy soǵys jáne eńbek ardagerlerine, basqa da meımandarǵa ásem bezendirilgen «Elbasy synyptastary» kitabynyń bir-bir danasy kózaıym etilip syıǵa tartyldy. Bir sholyp shyqqan adamnyń ózi-aq bul basylymnyń erekshe qundylyǵyna, baýrap alar tartymdylyǵy men mazmundylyǵyna birden nazar aýdaryp, kóz jetkizeri anyq.
Ǵıbratty kitapqa qysqasha toqtalar bolsaq, eń áýeli onda Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń Qaskeleńdegi Abaı atyndaǵy qazaq orta mektebin birge bitirgen synyptas dostarynyń estelikteri jınaqtalǵan. Ol estelikterde Nursultan Ábishulynyń balalyq jáne jastyq shaǵy, mekteptegi jáne odan keıingi ómiri týraly, bolashaqty bastap bergen balalyq shaq jaıynda rııasyz baıandalady. Sondaı-aq, munda olar bilim alǵan mekteptiń tarıhy, «Shapaǵat» tarıhı-ólketaný murajaıynyń tárbıe ordasy retindegi shertetin shejireli syrlary týraly áserli áńgimelengen. Bolashaq Elbasyna sabaq, tálim-tárbıe bergen Seıithan Isaev, Áset Asqarov sııaqty ustazdary da sóz alypty. Elbasynyń qadirlegen «bes jurty» haqynda jazýshy Beıbit Saparaly tolǵanady. Sonymen birge, synyptastardyń mektepte oqyp júrgen kezdegi, keıingi kezdesýler tusyndaǵy jarqyn sátterdi beıneleıtin qanshama qundy sýretter kórkem kitaptyń betterinen nur shashyp, tarıhymyzdyń san alýan belesterin bederleı kórsetip, pash etip turǵandaı.
«Ádebıettiń áleýmettik mańyzdy túrlerin basyp shyǵarý» baǵdarlamasy boıynsha jaryq kórgen osy aqjoltaı kitaptyń alǵashqy betinde aıshyqtalǵan Elbasy tolǵamy árkimge-aq oı salǵandaı. Ol qandaı sózder deseńiz: «Týyp-ósken jer ystyq qoı, dúnıeniń qaı túkpirinde júrsem de, týǵan elim, týǵan jerim eshqashan da esimnen shyqqan emes. Qaskeleń men Shamalǵannyń dál ústinen ushyp bara jatqanda júregim lúpil qaǵyp, erekshe sezimge bólenemin» deıtin izgi ańsar-murat, perzenttik káýsar mahabbat barshamyzǵa ystyq, janymyzǵa jaqyn emes pe?! Qazaq eliniń qazirgi de, keleshektegi de jastary osyndaı ulaǵattan úlgi alary da sózsiz. Kezdesýge qatysýshylarǵa quttyqtaý hat joldaǵan «Nur Otan» partııasynyń hatshysy, respýblıkalyq «Aq orda» qozǵalysynyń tóraǵasy Qaırat Satybaldy Elbasynyń naq osyndaı otanshyldyǵyn, týǵan jerge degen perzenttik keremet súıispenshiligin basa kórsetýi de sodan bolar.
Jınalǵandar Nursultan Nazarbaevtyń týǵan jerde bolǵan kezderi týraly derekti fılmdi erekshe yqylaspen tamashalady. Sodan keıin synyptastarǵa bilim bergen ustazdar: oqý isiniń meńgerýshisi Seıithan Isaev, hımııa jáne bıologııa pánderiniń muǵalimi Áset Asqarov zor qoshemetpen sahna tórine shaqyryldy. Búginde 94 jasqa kelip, sonyń 50 jyldan astamyn urpaq tárbıesine arnaǵan Uly Otan soǵysynyń ardageri Áset Asqaruly atalmysh kitapta «Táýelsiz el bolashaǵynyń jarqyn bolýyna teńdessiz eńbek etip júrgen balamyz Nursultanǵa mol baqyt tileımin. Mártebeń bıik bolsyn, Alla densaýlyq pen ómir bersin!» dep jazypty.
Zal toly jurt osydan soń KSRO halyq ártisi, Sosıalıstik Eńbek Eri, KSRO jáne Qazaqstan Memlekettik syılyqtarynyń laýreaty Bıbigúl Tólegenovany jyly qarsy aldy. «Balalyq shaǵymnyń aspany» kınofılminde Tuńǵysh Prezıdenttiń ájesiniń rólin tamasha músindegen súıikti ánshige degen halyq qurmeti de eselep óse túskendeı.
Kezdesýge Memleket basshysynyń 29 synyptasy kelgen eken. Olardyń bári osynaý biregeı kitaptyń ári avtorlary, ári keıipkerleri desek artyq emes. Synyptastardyń bárine de saltanatty jaǵdaıda, iltıpatty yqylaspen qurmet kórsetildi. Synyptastar el Prezıdentimen mekteptiń mereıli merekelerinde birge bolǵan jarqyn kúnderdi, sondaı-aq, bolashaq Elbasymen birge oqyǵan sonaý jyldardy bir qımas saǵynyshpen esterine aldy. Keńesbaı Baıbosynov, Raıa Sırazıtdınova, Kúlásh Ámirova, Edige Júnisbekov, Saılaýbek Qydyrálıev, Jomart Seksenbaev jáne basqalary jas Nursultannyń sol kezdegi týmysynan daryǵan erekshe daryn-qabiletterin atap kórsetti. Ol oqýdy úzdik oqypty, komsomol jastardyń kóshbasshysy bolyp, qoǵamdyq jumysta da, kórkemónerpazdar úıirmesinde de, sportta da top jaryp otyrypty. Elbasynyń jastyq shaqtaǵy osy jáne basqa da qasıetteri synyptastar shyǵarǵan ǵıbratty kitapta keńinen baıandalady.
Qorǵanbek AMANJOL,
«Egemen Qazaqstan».
Almaty.
