Aımaq basshysynyń aıtýynsha, qazirgi tańda 82 bala dárigerlerdiń kómegine júgingen.
«36 bala О́skemen qalasyndaǵy Ana men bala ortalyǵyna jatqyzyldy. Balalardyń jaǵdaıy qalypty, dárigerlerdiń baqylaýynda. Aldyn ala qoıylǵan dıagnoz – jedel ishek ınfeksııasy. Kesheden beri ol jaqta arnaıy komıssııa jumys isteýde, quramynda oblystyń bas pedıatry, epıdemıolog, ınfeksıonıst, sondaı-aq sanıtarlyq-epıdemıologııalyq baqylaý qyzmetiniń mamandary jáne aýdan ákimi bar. Búgin aýylǵa Bilim jáne densaýlyq saqtaý basqarmalarynyń, Sanıtarlyq-epıdemııalyq baqylaý qyzmeti departamentiniń basshylary, sondaı-aq oblys ákimi apparaty basshysynyń orynbasary shyqty», deıdi oblys ákimi.
Onyń aıtýynsha, mektep ashanasynda tamaqtandyrý isi jalǵa alýshy jeke kásipkermen uıymdastyrylǵan.
QR QK 304-baby 1-bóligi boıynsha qylmystyq is qozǵaldy. Árıne, bul ýákiletti organdar tarapynan tamaqtandyrýdy uıymdastyrý jumysyn júıeli baqylaýǵa almaýlarynyń saldary. Sondyqtan, búgin tıisti tulǵalar jaýapkershilikke tartylady. Sondaı-aq barlyq mektep, mektepke deıingi, sondaı-aq oblystyń arnaýly áleýmettik qyzmetter kórsetetin mekemelerine tekserý uıymdastyrylady.
«Ata-analarǵa turaqty túrde jedel jáne naqty aqparat berý týraly tapsyrma berildi. Sonymen qatar, Ana men bala ortalyǵynda emdelip jatqan balalar da ata-analarymen telefon arqyly baılanysqa shyǵyp otyrýlary qajet. Kesheden beri mektep karantınge jabyldy. Oqýshylar qashyqtyqtan oqytýǵa kóshirildi», deıdi Danıal Ahmetov.
Danıal Ahmetov sondaı-aq ata-analardan balalardyń densaýlyǵyna qatysty másele týyndaǵan jaǵdaıda dereý tıisti oryndarǵa habarlaýlaryn surady jáne másele jeke baqylaýynda ekenin jetkizdi.
