Túrkistan oblysy jáne Almaty qalasynan arnaıy kelgen qonaqtarǵa medısınalyq ortalyqty tanystyrǵan bas dáriger Lázzat Syzdyqova «Gastromed» – osy sala boıynsha úshinshi megapolıs pen Túrkistan oblysyndaǵy tuńǵysh joǵary deńgeıli mamandandyrylǵan ortalyq ekenin, munda bilikti kásibı mamandar komandasy jumys isteıtinin aıtty. «Medısınalyq ortalyq asqazan-ishek joldary, endrokındik júıe aýrýlaryn ambýlatorııalyq dárejede emdeıdi. Tik ishek máselesimen kelgen naýqastarǵa kishigirim otalar jasalady. Olar ekspertti deńgeıdegi qondyrǵalarda medısınalyq tekserýden ótip, joǵary bilikti dárigerlerden konsýltasııa ala alady. Sonymen qatar bizdiń ortalyqta naýqasqa zerthanalyq taldaýdyń barlyq túri júrgiziledi», deıdi Lázzat Ishanbekqyzy. Ortalyqta gastroenterolog dárigerlerden bólek, dıetolog, proktologtar da naýqastarǵa qyzmet kórsetýge daıyn. Ár dárigerdiń kabıneti sońǵy úlgidegi qural-jabdyqtarmen, zamanaýı endoskopııalyq apparattarmen jabdyqtalǵan.
S.Asfendııarov atyndaǵy qazaq ulttyq medısınalyq ýnıversıtetiniń gastroenterologııa kafedrasynyń meńgerýshisi, medısına ǵylymdarynyń doktory, professor Aleksandr Nersesov jańa medısınalyq ortalyqtyń jumysyna oń baǵa berdi. «Bul ortalyqtyń eń basty artyqshylyǵy – bilikti mamandarynda dep bilemin. Munda Túrkistan oblysynyń, Shymkent qalasynyń eń úzdik gastroenterolog mamandary jınalǵan. Al kez-kelgen mekemeniń júregi – bilikti mamandar ǵoı. «GastroMed» osyndaı bilikti mamandarymen naýqastarǵa óte sapaly em-dom sharalaryn júrgizip, senim údesinen shyǵa biledi degen oıdamyn», dedi professor.
Shymkent
