Tólebı aýdandyq polısııa bólimine birneshe jergilikti turǵyndar aýdan kóleminde esirtki zatyn satýmen aınalysatyny jóninde habarlama túsken. Atalǵan jaıt QR Qylmystyq Kodeksiniń 297-baby (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) boıynsha tirkeýge alyndy.
«Zańmen tyıym salynǵan esirtki zatyn daıyndap, satýy múmkin turǵyndardy anyqtap, qylmysty ashý maqsatynda Túrkistan oblysy Polısııa departamenti Esirtki qylmysyna qarsy is-qımyl basqarmasy men Tólebı APB-nyń tájirıbeli tártip saqshylarynan arnaıy top quryldy.
Polıseıler jedel-izdestirý sharalaryna birden kirisip, qylmystyq isti sońyna deıin jetkizý úshin jan-jaqty júıeli jumystar atqaryldy. Tártip saqshylarynyń eki aı boıy kúni-túni iske asyrǵan tyńǵylyqty tekserý jumystarynyń nátıjesinde, kúdiktilerdiń jeke-basy anyqtaldy», delingen habarlamada.
Osylaısha esirtki zatyn satýmen aınalysty degen kúdikpen bir táýlikte alty er adam turǵylyqty mekenjaılarynan ustalyp, APB-ǵa jetkizilgen. Olardyń barlyǵy jergilikti turǵyndar, onyń ishinde tórteýi buryn sotty bolǵan.
«Kúdikti dep tanylǵan er adamdardyń úılerine tintý júrgizý kezinde, úsheýiniń úıinen qaǵazǵa oralǵan esirtkige uqsas zat tárkilendi. Saraptama qorytyndysymen aıǵaqty zat retinde alynǵan zattyń bireýiniń salmaǵy 44 gramm, ekinshisi 26 gramm, úshinshisi 18 gramdy quraıtyn marıhýana ekendigi belgili boldy», deıdi oblystyq Polısııa departamenti.
Qazirgi tańda sotqa deıingi tergeý amaldary júrgizilýde. Sondaı-aq ustalǵandar qamaýǵa alynǵan.
