Kompozıtordyń ómiri men shyǵarmashylyǵyna negizdelgen qoıylym týraly belgili kompozıtor Jolaman Tursynbaı: «Spektaklde Shámshi ánderiniń kóp daýysty hormen shyrqalýy júrek tebirentti. Qazaqta on myń án, bes myń kúı bar desek, bul qoıylymnyń da rýhanı qazynamyzǵa qosylǵan tyń dúnıe ekeninde daý joq. Qoıylymǵa Shámshiniń eń maǵynaly, jaqsy ánderiniń toptastyrylǵany súısintti. Sóz ben án dombyranyń qos ishegindeı ásem úndesip tur. О́z basym Shámshi aǵamyzben kóp aralasqan adammyn. Spektaklden qazaq «valsiniń koroli» atanǵan ataqty kompozıtordyń san qyrly beınesimen qaıta qaýyshqandaı kúı keshtim», dep júrekjardy lebizin bildirdi.
Spektaklde oryndalatyn Shámshi ánderiniń qaı-qaısysy da avtordyń ómirinde oryn alǵan ártúrli oqıǵany baıandaıdy. Tula boıy ánge aınalǵan tulǵanyń áserli álemi kórermen kóńilin baýrap áketýimen qundy. Júrekterge sezim uıalatyp, mahabbat otyn mazdatqan mıýzıkldiń keıingi jastarǵa berer taǵylymy men tárbıelik máni óte zor. Mádına Omarova jazǵan mıýzıkldi trýppa ártisteri eki aıdan astam ýaqyt daıyndasa, al spektakldiń rejısseri, Qazaqstannyń eńbek sińirgen qaıratkeri Ashat Maemırov shyǵarmashyl tulǵanyń beınesi men óner jolyn halyqqa shynaıy jetkizý maqsatynda kompozıtordyń týǵan jerin aralap, kóp maǵlumatqa qanyǵyp qaıtqanyn alǵa tartady. Kompozıtordyń shyǵarmashylyq qorjynynda 300-ge jýyq án saqtalǵan desek, sahnalyq qoıylymǵa olardyń eń kóp taraǵan úzdikteri ǵana tańdap alynǵan. Spektakldiń bir ǵana Shámshimen shektelmeı, sahnaǵa úsh birdeı Shámshini qatar alyp shyǵýy jáne ánderdiń orkestr súıemeldeýimen jandy daýysta oryndalýy qoıylymnyń basty ereksheligi sanalady.
Aıta ketetin jaıt, Táýelsizdiktiń 30 jyldyq merekesi qurmetine ázirlengen qoıylymnyń premerasy naýryz aıynda ótken bolatyn. Belgili tulǵanyń kúresker beınesin Aman Ǵumarov, Ernar Muhambetov, ǵashyq kezin Salamat Muqashev, Ermahan Aımahan, al kompozıtorlyq qyryn Sultan Keńshilik, Azamat Bolatov syndy talantty jastar somdap, kompozıtordyń ómir jolynda kezikken qıyndyqtaryn, qoǵamǵa degen azamattyq kózqarasyn, teńizdeı týlaǵan ishki alapat sezimin, ǵashyqtyq syrlaryn áýezdi ánderimen ásem jetkize bildi. Sol sııaqty Aqan seri, Ahmet Jubanov, Muqaǵalı Maqataev, Roza Baǵlanova, Ábilahat Espaev, Tólegen Aıbergenov, Jumeken Nájimedenov sııaqty qazaq mádenıeti men ónerinde orny bıik qaıratker tulǵalar beınesiniń bir arnaǵa shoǵyrlanyp, qoıylymnan kórinis tabýy – buryn-sońdy paıdalanylmaǵan tyń tásil, óte sırek qubylys.
Mýzykalyq jas kórermen
teatry repertýaryndaǵy «Shámshi» mıýzıkli el bolashaǵy – jas býynnyń ónerge degen súıispenshiligin arttyrýda orasan zor is tyndyryp otyr deýge tolyq negiz bar. О́skeleń sana ınternetke telmirgen zamanda keıingi urpaqty tól qundylyqtarmen sýsyndatyp, jastarymyzdyń boıyna otanshyldyq sezimin uıalatýda teatr óneri aldynda úlken mindetter tur. Osy jaǵynan alǵanda, «Shámshi» spektakli jas urpaqqa kıeli ónerdiń taza aýasyn jutqyzýdy murat tutady. Teatrdyń Kameralyq orkestri súıemeldeýimen oryndalǵan «Jan aǵa», «Arys jaǵasynda», «Ánim sen ediń», «Qaıyqta», «О́mir-ózen», «Baqyt qushaǵynda», «Saǵynyshym meniń», «Qýanysh valsi», «Aq mańdaılym», «Syǵan áni», «Aqan seri», «Ana týraly jyr», t.b. ánder kóńil kókjıegin kórkemdikke bóleıtin tunyq bastaýlar ispetti.
Mádenıet pen óner qyzmetkerleri kúni qurmetine usynylǵan qoıylymdy dúldúl ánshi Dımash Qudaıbergen, halyqaralyq 71-shi Kann festıvaliniń laýreaty, «Nıka» júldesiniń ıegeri Samal Eslıamova syndy qazaq óneriniń týyn kóterip júrgen daryn ıeleriniń kelip tamashalaýynyń ózinde úlken mán bar. О́mir joly óz ónerińe qurmet kórsetýden bastalady.
