Qazylar alqasynyń sheshimimen fınaldyq kezeńge joldama alǵan 379 balanyń ishinde qaraǵandylyq Nurdáýlet Saǵatbek festıvaldyń Gran-prı júldesiniń ıegeri atandy.
Qaraǵandy oblystyq bilim basqarmasynyń kórý qabileti buzylǵan balalarǵa arnalǵan №1 arnaıy mektep-ınternatynda oqıtyn on tórt jastaǵy ónerpaz Dına Nurpeıisovanyń «Bulbul» kúıin oryndap, qazylar alqasynyń ǵana emes, tyńdaýshylardyń da ystyq yqylasyna bólendi.
Nurdáýlet mýzykamen es biletin shaǵynan beri aınalysady. Vokalmen de shuǵyldanady jáne fortepıanoda da jaqsy oınaıdy eken. Biraq dombyra úıirmesine 11 jasqa kelgende ǵana jazylypty.
– Úsh jyl ishinde men 13 kúı jáne bir án jazdym. Ánimdi ata-anama arnadym. Ánniń sózin О́rken Muńaıtpas jazǵan. Festıval kezinde men qatty ýaıymdamadym. Nege deseńiz, ózime senimdi boldym jáne jeńiske jetetinime kúmánim bolmady, – deıdi bolashaqta kúıshi, kompozıtor bolǵysy keletin ónerli óren.
Jeńimpazdyń jetekshisi Nurdáýlet Ydyrysovtyń aıtýynsha, daryndy jastyń ózi aınalysyp júrgen iske degen adaldyǵy, erekshe eńbekqorlyǵy kez kelgen adamdy tánti etedi eken. «Bul jas mýzykanttyń jalǵyz ǵana jeńisi emes. Ol – oblystyq jáne respýblıkalyq baıqaýlarda talaı márte top jaryp júrgen talant ıesi», deıdi Nurdáýlettiń jetekshisi.
QARAǴANDY
