Arman Shúıkenov oblysta saıaq jáne úıirli shegirtkeler bar ekenin atap ótti. Saıaq shegirtkelerdiń oblysymyzda 12 túri bar.
«Bıyl saıaq shegirtkelermen kúreske oblystyq bıýdjetten 7,163 mıllıon teńge qarajat bólindi. О́ńdeý jumystaryn 6,6 myń gektar jerde, oblystyń barlyq 10 aýdanynda jáne Pavlodar, Aqsý, Ekibastuz qalalarynyń aýyldyq aımaqtarynda ótkizý josparlanyp jatyr», dedi Arman Shúıkenov.
Al asa qaýipti úıirli shegirtkeniń Qazaqstanda 3 túri bar. Pavlodar oblysynda tek jalǵyz túri – Italıandyq prýs mekendeıdi.
«Oblysymyzda asa qaýipti shegirtkeniń kólemi jyl saıyn azaıýda. 2000 jyldardyń basynda 1 mıllıon 200 myń gektar óńdeletin. 2012 jyly 120 myń gektar óńdeldi. Azaıý 2018 jyldan bastaldy. Ol jyly 85 myń gektar, 2019 jyly 22,2 myń gektar, 2020 jyly – 8 myń, bıyl 2021 jyly 3048 gektar jer óńdelmek. Bul asa qaýipti shegirtkelerge respýblıkalyq bıýdjetten qarajat bólinedi», dedi Arman Shúıkenov.
Spıker óńirimizde shegirtkeler mamyr aıynda paıda bola bastaıtynyn aıtty. Sondaı-aq shegirtkeler qaýipti mólsherge jetken kezde ǵana hımııalyq óńdeý júrgiziledi.
«Bıyl ıtalıandyq prýs 12 mamyrda Baıanaýyl aýdanynda, saıaq shegirtkeler 5 mamyrdan paıda bola bastady. Bıyl ıtalıandyq prýsqa qarsy óńdeý jumystary Jelezın, Ertis jáne Sharbaqty aýdandarynan basqa, oblystyń barlyq aýdandarynda júrgizilip otyr. Sebebi bul aýdandarda úıirli shegirtkeniń qonystanǵan kólemi ekonomıkalyq zııandy sheginen aspaıdy», dedi Arman Shúıkenov.
Asa qaýipti shegirtkeler boıynsha hımııalyq óńdeýge jatqyzylatyn eń úlken kólemder Pavlodar aýdanynda – 1,200 myń ga, Tereńkól aýdanynda – 0,558 myń ga jáne Aqsý qalasynyń aýyldyq aımaǵynda 0,327 myń ga kólemdi quraıdy.
