Taǵy bir tamasha týyndy. О́n boıyna tarıhtyń daýysy sińgen. Kórgen bette keýdeńizge babalar úni, analar jyry keledi. Shyǵarmanyń ıesi – Sýretshiler odaǵynyń múshesi Nellı Býbe. Avtor kartınany «Arhaık» dep atapty. Sizdiń oıyńyzǵa eshteńeni salmaı ma? Tanys sóz, tamyryn bassańyz, dáýirlerdi attap ótesiz.
Negizinde, eńbek pen salt-sanamyzdyń shyraqshysy bolǵan kóshpendi áıel beınesi – N.Býbeniń shyǵarmashylyǵynyń basty ustyny. Kompozısııany barynsha tolyqtyryp turǵan altyn jalatylǵan kıimge, bas kıimge, dástúrli turmystyq buıymdarǵa yqylaspen nazar salsańyz, qop-qońyr qazaq aýyly qol bulǵaıdy. Ádet-ǵurpynan jańylmaǵan baıaǵy babatanymnyń úzilmegen úmiti men senimi bardaı. Oqyrmanǵa ártúrli atmosfera syılaýymen qyzyq ta qym-qýyt.
Kompozısııanyń ortasyna qyrynan, aldynan jáne arqasynan alǵan úsh rakýrstaǵy keremet áshekeılengen sáýkele kıgen qyzdyń portreti ornalastyrylǵan. Sýret aqshyl altyn fonǵa jazylyp, petroglıfter beınelengen qońyr tústi jaqtaýǵa jazylǵan.
Sheber Tamǵaly petroglıfterin beıneleı otyryp ári áıel zatynyń ejelgi bas kıimin paıdalaný arqyly baıyrǵy qazaq mádenıetiniń tamyryn basady. Sol arqyly skıf jáne saq taıpalarynyń dáýirin madaqtaıdy.
Jalpy, «Sáýkele» – áıelderdiń eń qymbat bas kıimi ǵana emes, ol jańa ómirdiń sımvoly retinde de qundy dúnıe. Bul qyz balasynyń erkeligi azaıyp, jańa otbasylyq ómiriniń bastalǵanyna belgi. Qymbat tastarmen áshekeılengen sáýkele qazaq halqynyń qoldanbaly óneriniń eń úzdik úlgileriniń biri sanalady. Muny avtor ádemi úılestirgen.
Sýretshi týyndysynyń bir ózgesheligi – boıaýynda. Naqty aıtqanda, eshqandaı ásireleý emes, jańa sımvol bere alatyn «fırmalyq», ıaǵnı altyn-qońyr túsi. Bul da sheberdiń orasan eńbeginen týǵan qubylys esebinde erekshe kóz tartady.
O bastan-aq dala halqy altyn-qońyr tústi qadir tutqan. Sonyń ishinde qazaq ulty qońyr tústi kıeli sanaǵan. Qazaq mádenıetinde «qońyr» sózi kóp maǵyna beredi. Qońyr boıaý rýhty oıatady hám jandy eliktirip áketetin sıqyrly qýat-kúshke ıe. Ata-babamyz barlyq jaqsylyqty sol sózben baılanystyryp otyrǵan eken.
Sýretshiniń shyǵarmashylyǵynda sary men qońyr tús birlesip, altyn zamandy, dala danalyǵyn saqtaǵan baıyrǵy ýaqytty eske túsiredi. Kartına keskindeme, grafıka, kollaj ádisteri aralasyp jazylǵan.
