Mınıstrliktiń málimetinshe, 1 tamyzdan bastap «Qazaqstannyń teń quqyqtar men teń múmkindikter ınstıtýty» qoǵamdyq qorynyń sarapshylar toby «Daǵdarys ortalyqtarynyń qyzmetin jetildirý, otbasylyq-turmystyq zorlyq-zombylyqtyń aldyn alý jáne agressorlarmen jumys isteý jónindegi sharalardy ázirleý jáne iske asyrý» áleýmettik jobasy aıasynda elimizdiń 17 óńirinde baspanalarǵa monıtorıng júrgizýge kirisedi.
Monıtorıng barysynda uıymdastyrýshylar turmystyq zorlyq-zombylyq qurbandary úshin salynǵan baspanalardyń, daǵdarys ortalyqtarynyń jumys modeli qanshalyqty tıimdi, qaýipsizdik júıesi oılastyrylǵan ba, zardap shekkender qandaı kómek ala alady degen suraqtarǵa jaýap berýi kerek.
«Monıtorıngtiń maqsaty – baspanalarda, daǵdarys ortalyqtarynda qandaı jumystar júrgizilip jatqanyn, turmystyq zorlyq-zombylyq qurbandaryna arnaıy qyzmet kórsetý standarty boıynsha olardyń qanshalyqty jumys istep otyrǵanyn kórý. Árıne, biz kórsetiletin qyzmetterdiń sapasyna nazar aýdaramyz. Ol úshin vebınarlar men trenıngter ótkizdik. Olardyń negizgi maqsaty daǵdarys ortalyqtary mamandarynyń bilimi men daǵdylaryn arttyrý, turmystyq zorlyq-zombylyq qurbandaryna arnaıy qyzmet kórsetýde keıs-menedjment tehnologııasyn qoldanýdy úıretý boldy», dedi «Qazaqstannyń teń quqyqtar men teń múmkindikter ınstıtýty» QQ prezıdenti Margarıta О́skembaeva.
QR Eńbek jáne halyqty áleýmettik qorǵaý mınıstrliginiń derekterine sáıkes 2021 jylǵy 1 sáýirdegi jaǵdaı boıynsha elde 29 baspana men daǵdarys ortalyǵy jumys istegen.
«Birneshe aı ishinde olardyń sany arta tústi. Ondaǵy qyzmetterdi memlekettik organdar ǵana emes, barlyq óńirlerdegi ÚEU-da memlekettik tapsyrys aıasynda usynady. Baspanaǵa jáne zardap shekkenderge jan-jaqty kómek kórsetý qajettiligi aıtarlyqtaı artýda», dep habarlaıdy Qor ókilderi.
Qazaqstandaǵy BUU agenttikteri júrgizgen jedel baǵalaý nátıjeleri boıynsha ózin-ózi oqshaýlaýdyń saldarynan úıdegi tıranııa jaǵdaılary 50%-dan astam jıilegen. 2020 jyly 8 myńnan astam adam ákimshilik jaýapkershilikke tartylyp, 79 myńǵa jýyǵyna qorǵaý nusqamasy toltyrylǵan.
Aıta ketsek, jobany QR Aqparat jáne qoǵamdyq damý mınıstrliginiń tapsyrysy boıynsha jáne Azamattyq bastamalardy qoldaý ortalyǵynyń muryndyq bolýymen «Qazaqstannyń teń quqyqtar men teń múmkindikter ınstıtýty» QQ júzege asyratyn bolady.
