Aldymen bul kezeń biliner-bilinbes bolyp bastalyp, sheńgelin salyp, boıdy tutas orap, bulqyna almaıtyn kezde baryp, basymyzdy kóterip, baıybyna bara bastaımyz. Biraq kesh bolady. Ony túsiný úshin sońǵy túsirilgen bir-eki sapaly Gollıvýd fılmin kórseń jetip jatyr, óner men mádenıettegi eń sońǵy jańalyq kórinisteri jarq etip aldyńnan ózi-aq shyǵady. Mysaly, endi júz jyldan keıin 2019 jyly ne bolǵanyn, qandaı tarıhı oqıǵalarymen este qalǵanyn arnaıy úńilgen zertteýshi mamandar, tarıhshylar aıtyp bermese, basqa eshkimniń esinde qalmasy anyq. Al 2020 jyl álemdik pandemııa men jer shary halqynyń uzaq ýaqyt boıy oqshaýlanyp úıinde otyrǵany jáne qamalyp qalǵan kezinde oǵan áleýmettik jeliler aınymas serik bolǵany týraly derekterdi ekiniń biri saırap turyp aıtyp beretinine búgin bás tigýge bolady. Osy ýaqyt aralyǵynda YouTube, Instagram, Fasebook buryn-sońdy bolmaǵan belsendilikke ıe bolyp, halyqtyń suranysyn týǵyzdy. Onlaın ómir súrýdi úırene bastaǵandar Zoom, Houseparty sekildi jańa ınternet qyzmetiniń túrin paıdalana bastady. Bul da eshnárse emes, 5-6 jastan joǵary kontent-meıkerdiń bári TikTok jelisine úıirsektep, ústine qara qurym bolyp úımelep aldy. Barlyq áleýmettik medıanyń ishinde talassyz tanymaldylyq, top jarǵan chempıon naq osy jeli bolyp shyqty.
Mysaly, Zoom jumyspen, bilim alýmen, alystaǵy aǵaıyn-týyspen qarym-qatynas jasaýǵa yńǵaıly bolsa, TikTok jumysy án aıtqan balalarmen, bılegen jasóspirimdermen, tipti zeınettegi ájelerdiń ónerimen jyldam jandanyp, oıyn-saýyq alańyna aınalyp shyǵa keldi. Búginde Fasebook-taǵy minsiz adamdar men Instagram-daǵy juldyzdardyń álem-jálem ómiri TikTok kontentiniń janynda jip ese almaı qaldy. Bul belsendiliktiń artýyna eks-prezıdent Donald Tramptyń Amerıka aýmaǵynda dál osy jeliniń jumysyna tyıym salamyn degen tepsingen málimdemesi qamshy bolyp tıgeni anyq. Qoǵamdaǵy túrli kózqarastyń bolýyna qaramastan Qytaıdyń bul aýqymdy jobasy sansyz qol jınaǵan WhatsApp, Instagram, Twitter jelilerimen qatar bir sapqa kelip qosylyp, qazir qysqa beınerolıkterimen básekege qabiletti alań ekenin baıqatyp úlgerdi.
Aıtyp ótkenimizdeı, TikTok-tyń maqsaty – aýdıtorııaǵa qýanysh-kúlki syılaý. Beınerolık alǵashqy mınýtta-aq adamdy «sileıtip» salýy kerek. Sondyqtan jeli paıdalanýshylarynyń komedııany ózinshe túsinip, ony bir mınýt aıasyna syıǵyzýy aqylǵa qonymdy kórinedi. Tipti rolık bastalmaı jatyp ne týraly bolatynyn birden túsinetinder bar. Boıanyp, sylanyp-sıpanyp, áıeldiń kóılegin kıip shyqqan bozbalalardyń isiniń durys-burystyǵyna kózi jetpesten, eki ezýin jııa almaı, esi ketetinderge qarap ne kúlerińdi, ne jylaryńdy bilmeısiń. Bul jaqsy ma, jaman ba? О́mirinde qýanyshy azaıǵan, sırek kúletin adam jany qalaǵan jylylyqtyń, sáýleniń, kúlkiniń ornyn arzan komedııamen toltyrýy qaýipti qubylys. Biraq jalpyadamzat balasy ekzıstensıaldy daǵdarysty bastan keship, kúlýge sebep azaıǵan kezde, bul qajettilikti óteýdi osy qosymsha moınyna alǵan sııaqty. Internettegi bir mınýttyq kúlki tutas komedııa janrynyń júgin kóterip otyr.
Bul turǵyda boıyndaǵy qabileti men talantyn kórsetýde bolashaq jas kınogerler úshin TikTok taptyrmas múmkindik alańy bolyp tur. О́ıtkeni byltyrdan beri kınoóndiris tolyqtaı toqtady, al adam únemi tutynýshy rólinde bolǵandyqtan, oǵan qajettilik báribir týady. Sol sebepti ár áleýmettik jeliniń óz serıaldary taratyla bastady. Úlken kıno álemindegi úderis sekildi, qysqa beınekórinisterdiń dáýiri bastalǵaly beri munyń da birinen-biri ótken belsendi ókilderi paıda bolyp, qalyptasyp, kúrep qarajat tapqan olıgarhtarǵa aınala bastady.
TikTok-tyń mádenıetti matap alǵanynyń taǵy bir kórinisi, bul qosymshany tanymal pop-mýzykanttardyń ózi paıdalanyp júr. О́ıtkeni komedııalyq sketchtiń bári mýzykamen kórkemdeledi.
Aldaǵy ýaqytta bul jeliniń belsendiligi artpasa, báseńdemeıtinin bári túsinip otyr.
