Qostanaı oblystyq Qazaqstan halqy Assambleıasy etnomádenı birlestikteriniń músheleri Joldaý týraly osyndaı tujyrymǵa kedi
Elbasy Nursultan Nazarbaev halyqqa dástúrli kezekti Joldaýyn joldaǵannan keıin, Qostanaıdaǵy «Dostyq» úıine oblystyq Qazaqstan halqy Assambleıasy etnomádenı uıymdarynyń, ǵylymı-saraptaý tobynyń jáne qoǵamdyq kelisim keńesiniń músheleri jınalyp, keńeıtilgen májilis ótkizdi.
Qostanaı oblystyq Qazaqstan halqy Assambleıasy etnomádenı birlestikteriniń músheleri Joldaý týraly osyndaı tujyrymǵa kedi
Elbasy Nursultan Nazarbaev halyqqa dástúrli kezekti Joldaýyn joldaǵannan keıin, Qostanaıdaǵy «Dostyq» úıine oblystyq Qazaqstan halqy Assambleıasy etnomádenı uıymdarynyń, ǵylymı-saraptaý tobynyń jáne qoǵamdyq kelisim keńesiniń músheleri jınalyp, keńeıtilgen májilis ótkizdi.
Olar ǵalamtor múmkindigin paıdalanyp, elektrondyq aqparat quraldary arqyly berilgen aqparattardy kórip, tyńdap, Joldaýda aıtylǵan máselelerden biraz habardar bolyp úlgerdi. Oblystyq Qazaqstan halqy Assambleıasy tóraǵasynyń orynbasary – hatshylyq meńgerýshisi Baǵytur Álimbaev Joldaýdyń mańyzyna toqtaldy.
– Elbasynyń bul kezekti Joldaýy el Táýelsizdigin alǵan jyldardan beri Qazaqstannyń ósý, damý jolyn kórsetkendeı boldy. Elbasynyń ár Joldaýynda elimizdiń bolashaǵyn aıqyndaıtyn maqsattar qoıylyp keldi. Osy kezge deıin Nursultan Ábishuly kótergen kóptegen máseleler júzege asty. Qazaqstannyń dúnıejúzindegi moıny ozyq elý eldiń arasynan oryn alýy, endi eń úzdik otyzdyqtyń qatarynan kóriný úshin alǵa úlken maqsattar qoıýy osynyń dáleli, – dedi B.Álimbaev. – Damýdyń úlgileri ózimizdiń oblysymyzdyń mysalynan da jeterlik. Qanshama ınnovasııalyq kásiporyndar, zaýyttar iske qosyldy. Aýyl sharýashylyǵyndaǵy jetistikter óz aldyna. Árıne, damýdyń joly taqtaıdaı tegis bolmaıdy, kemshilikter, áli de kóp eńbekti qajet etetin olqylyqtar da bar. Onyń barlyǵy da eńbektiń, birliktiń arqasynda jóndeledi.
Munan keıin oblystyq Qazaqstan halqy Assambleıasyndaǵy ǵylymı-saraptaý tobynyń múshesi, tarıh ǵylymdarynyń doktory Erkin Ábil sóz aldy.
– Elbasy Nursultan Nazarbaevtyń bul Joldaýynyń basty ereksheligi strategııalyq josparlaýdyń qajettiligin aıtýynda dep bilemin. Keńes Odaǵyndaǵy josparly ekonomıkadan keıin josparlaý tásiline keri kózqaras qalyptasyp qalǵandaı edi. Alaıda, ol josparlaý men bul strategııalyq josparlaýdy salystyrýǵa bolmaıdy. Josparlamasa aýajaıylýshylyq bolmaı ma? Jospar atqaratyn isińdi retteý, oǵan umtylý, kúsh-qýatyńdy jınaqtaý degen sóz ǵoı. Elbasy «2030» Strategııasy týraly aıtqanda keıbireýler oǵan kúmánmen qaraǵany jasyryn emes. Sonda aıtylǵan iri-iri máselelerdiń kópshiligi on bes jyldyń ishinde-aq júzege asty ǵoı. Elbasynyń Joldaýynda atan túıe tarta almaıtyndaı asqaq sıfrlar bar. Biraq aıtyldy ma, alǵa umtylsaq, kóringen tóbeniń alystyǵy bolmaıdy, ıgeremiz. Ol úshin Qazaqstanda múmkindik, jaǵdaı tolyǵymen jetedi. Mysaly, shıkizat bar, qarjy bar, kadr daıyndaý tájirıbesi bar, eger olardy oqytý kerek bolsa, qaıda oqytý kerek ekenin bilemiz, – dedi Erkin Amanjoluly.
Munan keıin polıak, tájik, ázerbaıjan, orys, t.b. etnomádenı birlestikter ókilderi Joldaý týraly óz oılaryn ortaǵa saldy. Polıak ultynyń ókili Vıktor Radýmskıı: «Maǵan Elbasynyń medısına týraly aıtqany óte unady. Adamdar óz densaýlyǵy týraly ózderi oılanýy qajet, qoǵamǵa bul pikir silkinis beredi. Dúnıedegi elderdiń turǵyndary densaýlyǵyn jóndeý úshin Qazaqstanǵa keletin kún de týar», dese, tájik Ergoshvoı Holmatov: «Nursultan Nazarbaev orta jáne shaǵyn bıznes týraly óte oryndy aıtty. Iri ınnovasııalyq zaýyttar kerek, biraq olardaǵy jumys orny shekteýli bolady ǵoı. Sondyqtan adamdarǵa jumys berýshi negizinen shaǵyn jáne orta bıznes bolýy qajet. Kim de bolsa jumys istegende ǵana jaqsy turady», dedi. Orys etnomádenı birlestiginiń jetekshisi Iýrıı Ivlev: «Prezıdenttiń Joldaýynda kóterilgen máseleler men alǵa qoıǵan maqsattardyń barlyǵy shynaıy dep bilemin. О́ıtkeni, osydan on bes jyl buryn Qazaqstanda mashına jasaý isi osynsha damıdy dep kim oılaǵan edi? Bolashaqta robottehnıka da qazaqstandyqtar úshin jat bolmaıtynyna senemin», dedi.
Qostanaıda bir atanyń balalaryndaı tatýlyqty tý etip turyp jatqan kóp ulttyń ókilderi Elbasynyń bıylǵy «Qazaqstan joly – 2050»: bir maqsat, bir múdde, bir bolashaq» atty Joldaýynda ómirdiń barlyq salasy qamtylǵandyǵyn tilge tıek etti. Olardyń barlyǵy da endigi maqsat – bul qujattyń qazaqstandyqtardyń tegis tanysýy, árkimniń júreginde júretin aldaǵy ýaqyttyń baǵdarshamy bolýy qajettigin aıtty.
Názıra JÁRIMBETOVA,
«Egemen Qazaqstan».
QOSTANAI.
