Dál osy 1840 jyly qazaq dalasynda alǵashqy sapaly fotosýretterdiń biri túsirildi. Ol – Bókeı Ordasynyń sońǵy hany, Jıhanger – Jáńgir hannyń áıeli Fatımamen birge túsken sýreti. Jáńgir hannyń úsh áıeli bolǵany tarıhtan málim: Júzim hanym, Fatıma hanym, Salıha hanym. Osy úsh hanymnyń arasynda hannyń kóńili Fatımaǵa erekshe qulaǵan desedi. Onyń sebebi, Reseıdiń tuńǵysh mýftıi Muhamedjan Husaıynovtyń qyzy – sulý da zııaly, musylmansha hatqa júırik, eýropasha bilim alǵan, óz zamanynyń ozyq tárbıe alǵan áıelderiniń biri Fatımanyń erekshe aqylynda bolýy da múmkin. Hanǵa jeti bala taýyp bergen Fatımany el de Fatıma totash dep bekerge áspettep, álpeshtemese kerek. Fatıma totash Jáńgirdiń qaı sharýasynda da aqylyn salǵan, keńesin bergen jar bolǵanyn ańǵaramyz.
1840 jyly Jáńgir Bókeıuly úshin qat-qabat sharýaǵa toly, qaýyrt ári erekshe jyl bolǵanǵa uqsaıdy. Osy jyly jary Fatıma syrqattanyp, emdelý úshin ekeýi Pıatıgorsk qalasyna baryp, Pýshkın men Lermontov túsken Aleksandra Merlınniń úıine toqtaıdy. Keıin Fatıma men Aleksandra hat jazysyp turǵany týraly derekter bar. Dál sol jyly Jáńgir han Orynbor áskerı gýbernatory G.A.Perovskııdiń nusqaýymen general-maıor shenin alady.
1840 jyly túsirilgen Jáńgir men Fatımanyń fotosýretine zer salyp qarasaq, Fatıma hanymnyń aıaǵy aýyr ekenin baıqaımyz. Ananyń altyn qursaǵynda – qazaqtan shyqqan tuńǵysh kavalerııa generaly, knıaz ataǵyn alǵan Ǵubaıdolla Jáńgiruly jatyr. Ǵubaıdolla 1840 jyly ómirge keldi. Keı derekterde 6 mamyr, taǵy birinde 19 mamyr dep kórsetilip júr. Demek, bul sýret osy jyldyń kókteminde túsirilgen bolyp shyǵady.
