Densaýlyq saqtaý mınıstri Alekseı Soı eldegi sanıtarııalyq-epıdemıologııalyq jaǵdaı týraly baıandama jasady. Sońǵy eki aptada COVID-19 aýrýshańdyǵy 60%-ǵa, ólim deńgeıi 80%-ǵa tómendedi. Infeksııalyq tósek oryndary júktemesi deńgeıiniń 56%-dan 33%-ǵa deıin, reanımasııalyq tósekterdiń 45%-dan 32%-ǵa deıin tómendegeni baıqalady.
Sondaı-aq epıdemıologııalyq jaǵdaıdyń jaqsarýyna baılanysty vedomstvoaralyq komıssııa barlyq sanıtarııalyq talaptardy qatań saqtaı otyryp, brıfıngter men baspasóz konferensııalaryn kúndizgi rejımde ótkizý týraly sheshim qabyldady. Osylaısha, QR Prezıdenti janyndaǵy Ortalyq kommýnıkasııalar qyzmeti men óńirlik kommýnıkasııalar ortalyqtary bazasynda «Ashyq» qosymshasynda «jasyl» mártebesi bar BAQ ókilderi oflaın formatta baspasóz konferensııalaryna qatysa alady.
Komıssııa otyrysy barysynda el óńirlerindegi koronavırýstyq ınfeksııanyń jaǵdaıy jáne azamattardy vaksınasııalaý deńgeıi týraly baıandamalar tyńdaldy. Premer-Mınıstrdiń orynbasary óńirlerge ımmýndaý qarqynyn tómendetpeýdi tapsyrdy.
Sonymen qatar VAK kelýshilerdiń mártebesin teksermeıtin «Ashyq» júıesiniń 12 myń josyqsyz qatysýshysyn 2 aptaǵa júıeden alyp tastaý týraly sheshim qabyldady.
Vedomstvoaralyq komıssııanyń otyrysyn qorytyndylaı kele, Eraly Toǵjanov birqatar naqty tapsyrmalar berip, VAK qatysýshylarynyń aldynda taıaý ýaqyttaǵy basym mindetterdi belgiledi.
