Is-sharany Qazaqstan Respýblıkasynyń Tuńǵysh Prezıdenti – Elbasy kitaphanasy dırektory Baqytjan Temirbolat ashty.
«Elbasy N.Á. Nazarbaev Abaı murasynyń qazaqtyń eń qasıetti qazynasy ekenin árdaıym belgileıdi. Onyń bul oıyn qoldaıtyn memleket basshysy Q.Toqaev ta Abaıdyń ósıet-ónegesi XXI ǵasyrdaǵy jańa Qazaqstandy bıikterge jeteleıtinin alǵa tartady.
Abaı Qunanbaıuly – Uly dala tarıhyna óshpes iz qaldyrǵan dara tulǵa. Onyń shyǵarmalaryn nasıhattaý joldary men tásilderi jyldan jylǵa túrlenip, kemeldene túsýde. Aqynnyń óleńderine sıfrlyq tehnologııany paıdalanyp, sanalýan beınerolık túsirip, birneshe tilde nasıhattaǵan jastardyń talaby men jigeri, akterlik sheberligi tań qaldyrady. Ár sózimen ulttyń óresin ósirýdi kózdegen Abaıdyń ǵaqlııalaryn zerdege toqý ári sheberlikpen paıdalana bilý – urpaqqa mindet. Al óskeleń urpaqtyń zerdesin ashyp, ulttyq mádenıetimiz bán ádebıetimizdiń tunyq nárin sanasyna sińirý - bizdiń paryzymyz», dedi ol.
Qazaqstan Respýblıkasy Parlamenti Májilisiniń depýtaty Darhan Myńbaı ádebıet saıysynyń jeńimpazdary men qatysýshylaryn quttyqtady.
«Júzden júırik, myńnan tulpar bolǵan búgin jeńimpazdar Abaı babamyz ben ult mádenıeti aldyndaǵy perzenttik paryzyn oryndaýda adaldyq tanytty. Osy oraıda Elbasy kitaphanasynyń Abaı murasyn nasıhattaýda jańa kezeńdi, jańa mádenıetti bastap jatqanyna rızamyn», dedi Májilis depýtaty.
«Esterińizde bolsa, Elbasynyń sheshimimen Abaıdyń 150 jyldyǵy IýNESKO deńgeıinde toılanǵan bolatyn. Abaıǵa degen betburys sol kezeńnen bastaý aldy. Halyqty bilim men eńbekke úndegen Abaıdy oqyǵan adam úlken dárejege jetetini sózsiz. Sondyqtan búgingi jeńisterińiz – ǵylymǵa basqan alǵashqy qadamdaryńyz», dedi L.N. Gýmılev atyndaǵy Eýrazııa ulttyq ýnıversıteti janyndaǵy «Abaı akademııasy» ǵylymı-zertteý ınstıtýtynyń dırektory Jandos Áýbákir.
Ádebıet saıysynyń jeńimpazdaryn marapattaý rásimine Elbasy kitaphanasynyń qorynan arnaıy kitap kórmesi ázirlendi. Kórmede Abaıdyń 40-qa jýyq eńbegi, belgili otandyq abaıtanýshylardyń aqynnyń ómiri men shyǵarmashylyǵyn zerttegen monografııalary, sondaı-aq uly aqynnyń shet tilderine aýdarylǵan týyndylarynyń aýdarmalary qoıyldy. Kópshilik nazaryna sondaı-aq mýzykalyq qoıylymdar usynyldy. Saıys qatysýshylary da óleń joldaryn oqyp, qulaq quryshyn qandyrdy.
Igi dástúrge aınalǵan Abaı oqýlaryna 5 jyldyń ishinde 4000-ǵa jýyq adam qatysyp úlgerdi. Bıyl 56 fınalıst iriktelip, 11 jeńimpaz anyqtaldy. Ádil qazylar alqasynyń sheshimi boıynsha júldeli oryndar men nomınasııalarǵa ıe bolǵandar:
Gran-prı – Nur-Sultan qalasynyń Máshhúr Júsip atyndaǵy № 57 mektep-lıseıiniń 8-synyp oqýshysy Gúlnaz Eńsebaeva.
«Shyny kerek, bas júldege ıe bolam dep oılamappyn. Saıysqa qatystyrǵan beınerolıkti tek jeke darynymdy damytý úshin túsirgen bolatynmyn.
Sondyqtan da ádil qazylar alqasynyń joǵary baǵasyn úlken abyroı dep sanaımyn. Búgingi jeńisim endi jańa belesterdi baǵyndyrýǵa yntalandyryp otyr», dedi Gran-prı ıegeri.
I oryn – Pavlodar oblysy, Aqsý qalasy Jambyl orta mektebiniń 4-synyp oqýshysy Aıdana Ahman;
II oryn – Qazaqstan Respýblıkasy Prezıdent Is basqarmasy medısınalyq ortalyǵy aýrýhanasynyń jetekshi menedjeri Araı Jylqybaeva, Ekibastuz qalasy №13 Jalpy orta bilim berý mektebiniń 1-synyp oqýshysy Jiger Hasen;
III oryn – Pavlodar oblysy, Ertis aýdany №4 Orta mektebiniń 4-synyp oqýshysy Roman Kýznesov, L.N. Gýmılev atyndaǵy EUÝ-diń 2-kýrs stýdenti Ramazan Erjigit, Qaraǵandy medısına ýnıversıtetiniń 3-kýrs stýdenti Ásem Turmahanda.
Saıysqa atsalysyp, kóptiń kóńilinen shyqqan úmitkerlerge de nomınasııa berildi. Atap aıtqanda:
«Eń belsendi qatysýshy» – Qaraǵandy medısınalyq ýnıversıtetiniń 2-kýrs stýdenti Arýjan Amantaeva;
«Kórermen kózaıymy» – Aqtaý qalasynyń №21mektep-lıseıiniń 8-synyp oqýshysy Aızere Mahambet;
«Eń izdempaz úmitker» – Aqtóbe qalasy № 47 orta mektebiniń 2-synyp oqýshysyTemirlan Qonaqbaev;
«Abaı murasyn álemdik deńgeıde nasıhattaýshy» – L.N. Gýmılev atyndaǵy EUÝ-diń 1 kýrs stýdenti Medına Beısen.
Top jaryp, jeńisti qanjyǵasyna baılaǵan qatysýshylar dıplom men estelik syılyqtarmen marapattaldy.
Esterińizge salsaq, «Instagram», «Facebook» áleýmettik jelisine saıyskerler jarııalaǵan beınerolıktermen #bizdińAbaı, #Abaıádebıetestafetasy, #ElbasykitaphanasyAbaı heshtegteri arqyly tanysýǵa bolady.
