Bul týraly Densaýlyq saqtaý mınıstri Alekseı Soı QR Prezıdenti janyndaǵy Adam quqyqtary jónindegi komıssııanyń otyrysynda aıtty.
«Medısınalyq kómekti qoljetimdi ári sapaly etý úshin densaýlyq saqtaý júıesiniń ınfraqurylymyn damytýǵa, maman daıarlaýǵa jáne halyqty dárilik zattarmen qamtamasyz etýge qarjy bólý boıynsha qosymsha sharalar qabyldandy. Aýyldarda medısınalyq kómektiń úlesi arttyrý úshin 137 tirek eldi mekende feldsherlik-akýsherlik medısınalyq pýnktter men dárigerlik ambýlatorııalar ashý kózdelgen», dedi mınıstr.
Onyń aıtýynsha, ınvestısııalyq joba aıasynda elimizde 20 zamanaýı aýrýhana men 2 ǵylymı-ınnovasııalyq ortalyq salynyp jatyr.
«Sonymen qatar óńirlik medısınalyq uıymdardyń ınfraqurylymyn damytý úshin 85 mlrd teńgege kem degende 20 nysan salý jáne jańǵyrtý kózdelgen. Halyqty dárilik zattarmen jáne medısınalyq buıymdarmen qamtamasyz etý úshin aǵymdaǵy jyly 386,5 mlrd teńge kóleminde qarajat bólindi. Prezıdent otandyq farmasevtıkalyq ónim úlesin 17%-dan 50%-ǵa deıin jetkizýdi tapsyrdy. Sonyń aıasynda mınıstrlik jahandyq farmasevtıkalyq korporasııalarmen yntymaqtaty jandandyryp, ınvestor tartýda, tehnologııalar men jańa ázirlemelerdiń transfertin iske asyra bastadyq», dedi Alekseı Soı.
Sondaı-aq ol medısınalyq buıymdardy synaqtan ótkizetin arnaıy ortalyq qurylatynyn atady.
«Halyqaralyq standarttar boıynsha akkredıttelgen medısınalyq buıymdarǵa zerthanalyq jáne tehnıkalyq synaqtar júrgizýge arnalǵan ortalyq qurý mindeti tur. Atalǵan is-sharaǵa 18,3 mlrd teńge somasynda qarjylandyrý qarastyrylǵan», dedi Alekseı Soı.
