Kórkem beıneni boıaý tilimen sóıletken sýretshi, keskindemeshi, Mádenıet qaıratkeri, Prezıdent stıpendııasynyń ıegeri Jeńis Kákenulynyń «Sáıgúlik semantıkasy-4» atty jeke kórmesi Qazaq eliniń Tuńǵysh Prezıdentiniń mýzeıinde ashyldy.
Avtordyń 50 týyndysy qoıylǵan kórme mýzeıdiń áriptestik jobasy aıasynda uıymdastyrylǵan. Týyndylardyń barlyǵy 2006-2013 jyldar aralyǵynda salynǵan eken. Atap aıtqanda, «Arbaý óleń», «Jasyrynbaq-2», «Syılyq», «Kentavrdyń ǵashyǵy», «Jetkinshek», «Baıshubar», taǵy basqalar. Avtordyń ásirese «Básire» dep atalatyn dúnıesiniń jóni bólek.
– Jylqy tekti janýar ǵoı. Tili joq demeseń, bárin túsinedi. Meniń basqa sýretshilerden ereksheligim – jylqyny adam deńgeıine kóterip, beıneleýge talpynyp kelemin.
Sýretshi Jeńis Kákenulynyń týyndylary 1988 jyldan beri elimizdegi, sondaı-aq, AQSh, Germanııa, Túrkııadaǵy kórmelerden oryn alyp júr. Al ótken jyly sýretshi «Aq zer» kitabyn jaryqqa shyǵardy. Bul jınaqqa ulttyq beıneleý óneri, qazaq sýretshileriniń shyǵarmashylyq bolmysy týraly pýblısıstıkalyq eńbekteri, ónertaný jaıly maqalalary toptastyrylǵan. Ol «Folıant» baspasynyń sýretshisi retinde qyryqtan astam kitapty bezendirgen.
Janerke TО́LEN,
EUÝ-diń stýdenti.
––––––––––––––––––
Sýretterdi túsirgen Erlan OMAROV.
