«Eýropalyq Odaq 2023 jyldan bastap kómirtekti qajetsinetin ónimder ımportyna salynatyn shekaralyq kómirtek salyǵyn engizýdi josparlap otyr. Bul halyqaralyq saýda erejelerin túbegeıli ózgertetin bolady. Parıj kelisimi aıasynda Qazaqstan ózine 2030 jylǵa qaraı shyǵaryndylardy 1990 jylǵy deńgeıden 15 paıyzǵa, al halyqaralyq qoldaý kórsetiletin jaǵdaıda 25 paıyzǵa qysqartý mindettemesin aldy», dedi mınıstr Ortalyq kommýnıkasııalar qyzmetindegi baspasóz máslıhatynda.
Alaıda, mınıstr búgingi tańda shyǵaryndylar 1990 jylǵy deńgeıden áldeqashan asyp ketkenin aıtady.
«Aıtarlyqtaı is-sharalar qabyldanbasa, boljam boıynsha jalpy shyǵaryndylardyń ulǵaıýy jalǵasyp, 2060 jyly 473 mıllıon tonnadan asatyn bolady», dedi ol.
Osy rette Serikqalı Breshekev Qazaqstan Respýblıkasynyń Parıj kelisiminiń temperatýralyq talabyn saqtaý, sondaı-aq Memleket basshysynyń kómirtegi beıtaraptyǵyna qol jetkizý týraly málimdemesin iske asyrýǵa úles qosý úshin 2060 jylǵa deıin kómirtegi beıtaraptyǵyna qatysty doktrınasynyń jobasy ázirlengenin atap ótti.
«Doktrınany ázirleý kezinde naqty ekonomıkany modeldeý úshin eń ozyq TIMES, CGE jáne System Dynamics úlgileri qoldanyldy. Bul barynsha az ınvestısııalyq shyǵyndar jumsaý jáne barynsha kóp ekonomıkalyq paıda alý turǵysynan alǵanda Qazaqstan ekonomıkasyn kómirsizdendirýdiń eń ońtaıly jolyn anyqtaýǵa múmkindik berdi», dedi mınıstr.
