Asarlyqtar adymy

«Ońtústik Qazaqstanda «Asar» degen shaǵyn aýdan­da men ózim boldym. Úı janynda jer jáne jylyjaı salynǵan. Olar úsh jyldyń ishinde nesıeni qaıtaratyn bolady. Bul degenińiz keremet nárse!». Tikeleı efır arqyly elmen júzdesýdiń birinde Elbasy Nursultan Nazarbaev Shymkenttiń irgesindegi «Asar» shaǵyn aýdany týraly osylaı dep aǵynan jarylyp edi. Shynynda, «Asar» shaǵyn aýdany oryn tepken jer osydan bes-alty jyl buryn aıdala bolatyn  dese, búginde eshkim senbeıtin shyǵar, sirá! Búginde «Asar» shaǵyn aýdany yntymaq-birligi jarasqan bir qaýym el bolyp otyr. Jaqynda «Asarǵa» jolymyz tústi. Ádemi úıler, túp-túzý kóshe, ár úıdiń janyndaǵy shaǵyn jylyjaıy bul shaǵyn aýdan turǵyndarynyń turmystarynyń baqýatty ekenin baıqatatyny anyq. Sáýletti de sándi mektebi men balabaqshasy balalardyń shat kúlkisine to­ly. Balalardyń bilimge degen qushtarlyqtary erekshe. Tu­saýy byltyr ǵana kesilgen osyndaǵy № 90 mekteptiń oqýshy­lary bir jyldyń ishinde biraz jetistikterdi baǵyndyryp úlge­ripti. «Qashanda daıyn tirlikti jal­ǵastyryp ketkennen, bárin basynan bastaý óte qıyn ǵoı, – deıdi №90 jalpy orta mektebiniń dırek­tory Arman Shymbaıuly Orynbekov.  – Biz osy bir jyldyń ishinde tájirıbeli ustazdardyń basyn jınap, bilikti ujym qura bildik. Árıne, naǵyz jumys, naǵyz qıyndyqtyń bári alda ǵoı. Qazir bul mektepte 1180 oqý­shy bilim alyp jatyr. Bıyl 84 túlek ushyrǵaly otyrmyz. Oqýshylarǵa 104 muǵalim sabaq beredi. Olar óz salalary boıynsha onnan astam oqý-ádistemelik oqý quraldaryn  jazyp, basyp shyǵardy. Respýblıkalyq, halyqaralyq deńgeıde ótip jat­qan ǵylymı-praktıkalyq kon­ferensııalarǵa qatysyp, maq­taý qaǵazdarymen marapattalýda. Asarlyqtardy qınaıtyn bir másele,  shaǵyn aýdanymyzdyń  qala­dan birshama qashyqta  ornalasýy. Osydan keıin árıne, oqýshylardyń túrli úıirmelerge, sporttyq seksııalarǵa qatysýy qıyn bolyp tur. Olar qala­ǵa baryp kelemin degenshe kóp ýaqyt joǵaltady. Osy maq­satta Shymkent qalasynyń áki­mi qoldap, «Aýla klýbtary» baǵdarlamasy negizinde biraz úıirmeler ashyldy. Muny uıym­dastyrýda Shymkent qala­lyq bilim bóliminiń basshysy J.Tájıevanyń  eńbegi zor boldy. Sport salasynda oqýshylyrymyzdyń qol jet­kizgen jetistikteri de aıtar­lyqtaı. Búgingi kúnge deıin olar qala, oblys, respýblıka jáne halyqaralyq deńgeıde ótken júzden astam sporttyq saıys­tarǵa qatysyp, júldeli oryndarǵa qol jetkizdi. Jýyrda ǵana taekvondo úıirmesine qaty­syp júrgen 10-synyp oqýshysy Áıgerim Áshirbekova Koreıa elinde ótken halyqaralyq jarysta 1-oryn alyp keldi. «Ton jaǵasyz, el aǵasyz bolmaıdy» demekshi «Aq orda» korporasııa­sy qoldaý kórsetip, 600 myń teńgege mýzykalyq aspap pen 100 myń teńgege sporttyq qural-jabdyqtar alyp berdi. Odan bólek qaladan qatynap oqıtyn oqýshylar úshin bir «Gazel» kóligin júrgizýshisimen bóldi. Árıne, osyndaı janashyr jandardyń qoldaýy ujymnyń shyǵarmashylyq izdenisine úlken shabyt bergeni anyq». Iá, jańa ujymnyń az ýa­qytta qol jetkizgen tabystary maqtanyp aıtýǵa turarlyq. Bıylǵy UBT-nyń qorytyndysy boıynsha № 90 jalpy orta mektebi Shymkent qalasy boıynsha birinshi oryndy ıemdenip, qala ákiminiń alǵys hatymen marapattaldy. «Taǵy bir aıtarym, búgingi kúnniń sheshimin tabýda kezek kúttirmeıtin ózekti máselelerdiń biri – jastardyń jat dinı aǵym­­­­­darǵa kirip ketýi. Meniń oıym­sha, din qyzmetkerleri óz ýaǵyzdaryn, sharıǵat qaǵı­dat­taryn ǵylymmen baılanys­tyra otyryp túsindirse, óıt­keni, búgingi kúni ǵalymdar ash­qan jańalyqtar qasıetti kita­bymyzda áldeqashan baıandalyp qoıǵany belgili. Mekteptiń maq­saty bilim berýmen birge, eń aldymen tulǵany qalyptastyrý, óz eliniń azamatyn tárbıelep shyǵarý. Sondyqtan dintaný saba­ǵyn da ǵylymı prınsıpterge negizdep túsindirý kerek dep oılaımyn. «Bala degen jas shy­byq, qalaı qaraı ıseń, solaı maıysady» degen sóz beker aıtylmaǵan. Jańa oqý jylynan bastap eńbek pániniń bir saǵatyn qysqartyp tastady. Menińshe eńbek sabaǵynyń qalǵan bir sa­ǵatynda oqýshylar eshteńe ja­sap úlgere almaıdy. Bizdiń mekteptiń oqýshylary sheberhanada shahmat taqtalaryn, astaý, kúbi, besikti ózderi qolmen jasa­dy. Bul jas­tardy eńbekke baýlý, sheberligin arttyrý emes pe?» deıdi №90 jalpy orta mek­­te­biniń dırektory Arman Orynbekov. «Ustazy jaqsynyń – ustamy jaqsy» degen, asyl murattarǵa toly egemendiktiń arqasynda elge el qosylyp, irgesi keńip jatqan «Asar» shaǵyn aýdanynda mine, osyndaı jastar ósip keledi. Oralhan DÁÝIT, «Egemen Qazaqstan». Ońtústik Qazaqstan oblysy. Sýrette: № 90 mektep dırektory Arman Orynbekov.