Sırek kezdesetin dertke dýshar bolǵan balalar tegin emdeledi

Dárigerlerdiń aıtýynsha, Dıýshen mıo­dıs­trofııasy – sırek kezdesetin ge­ne­­tıkalyq aýrý. Tuqym qýalaıtyn qa­ýip­ti dert balaǵa kóbine anasynyń qany arqyly ótedi eken. Mundaı aýrýǵa ushy­raǵan sábıdiń bulshyq etteri birtin­dep jansyzdana beredi.

Taıaýda ǵana oblystyq densaýlyq saqtaý basqarmasy Jumaǵul Dastan, Baqdáýlet Qazybaı, Aspantaı Álimbaı esimdi naýqas balalar úshin arnaıy «Eteplırsen» dárisiniń 91 qutysyn satyp aldy. Basqarmanyń málimetinshe, úsh balaqaıdyń emine jetetin dári-dármekke 235,7 mln teńge ketken. Ata-analar sarylyp kútken baǵaly dári Qostanaıǵa qarashanyń ortasyna taman jetkizilýi tıis edi, alaıda belgilengen merzimnen edáýir erte keldi.

Máselen, qymbat dáriniń birinshi flakony Aspantaıdyń anasy Maqpal Nyǵmetjanovanyń qolyna qazannyń 27-si kúni tıgen. Dári kelisimen úsh bala ata-analarymen birge Nur-Sultan qalasyndaǵy Ana men bala ortalyǵyna baryp, alǵashqy sıstemasyn alýǵa kiristi. Móp-móldir qarashyǵyndaǵy kúlkiniń ornyn muń basqan qarshadaı balanyń semip bara jatqan ómirine tamyzdyq bolatyn tamyr tamshylarynyń qalǵanyn dárigerler Qostanaıda tamyzady. Ata-analardyń aıtýynsha, balaqaılardyń úsheýi de birinshi sıstemalaryn jeńil eńsergen.

– Dárigerler dári birden áser etpeıdi deıdi. Shıpasy birte-birte biline bastaıdy eken. Eń bastysy, dári qabyldaǵaly, balalarymyzdyń jaǵdaıy jaqsaryp, kóńil kúıi kóterińki. Bulshyq etteri de tez álsiremeıtin boldy. Alaıda bul dári-dármekter úsh-aq aıǵa jetedi. Máslıhat aldaǵy jylǵa da qarjy qa­rastyryp, qamqorlyq tanytady dep úmittenemiz, – dedi M.Nyǵmetjanova.

Oblystyq densaýlyq saqtaý bas­qar­ma­sy, budan ózge arqa bulshyq etteri semip bara jatqan taǵy úsh balaǵa 12 quty «Nýsınersen» dárisin satyp alý úshin 506,9 mln teńge bólingenin málimdedi.

Arqa bulshyq etteri artrofııasymen aýyratyn kishkentaı Mıhaıldyń ákesi Aleksandr Gorpenko balasynyń emi 22 qarashadan bastalatynyn aıtty.

– Ulymdy emdeý úshin Nur-Sultan qalasynan arnaıy mamandar keledi. Emdeý sharalary Qostanaıda ótedi. Dárigerlerdi taǵatsyzdana kútip otyrmyz, – dedi A.Gorpenko.

Sırek kezdesetin dertke shaldyqqan sońǵy úsh balanyń bireýine qajet dári-dármekti taýyp berýdi «О́mirge sen» qory óz mindetine alyp otyr.