Chempıondar marapattaldy

Jeńimpazdardy quttyqtap, altyn medaldar men chempıondyq tondony tabys etken bas hatshy «Tobyldyń» jetistigine oblys turǵyndarynyń tarıhı jeńisi degen baǵa berip, aımaq basshysy Arhımed Muhambetovke altyn medal taqty.

Oıynshylardy oblys ákimi de quttyqtap, jeńis jolynda aıanbaı ter tókken fýtbol klýbynyń quramyna, fýtbolshylarǵa dem berip, únemi qoldaý kórsetýden tanbaǵan kópshilik jankúıerlerge rızashylyq bildirip, alǵys aıtty.

– Búgingi tańda oblysta bu­qaralyq sport túrlerin damytýǵa jáne salamatty ómir saltyn qa­lyptastyrýǵa kóp kóńil bólip jatyrmyz. Mysaly, sońǵy úsh jyldyń ózinde óńirde 105 shaǵyn fýtbol alańy salyndy. Onyń 65-i aýdan ortalyqtary men ti­rek aýyldarda, qalǵany oblys or­talyǵynda ornalasqan. Al­tyn­sarın, Qamysty aýdandary men Lısakov, Arqalyq, Rýd­nyı qalalaryndaǵy stadıondar­dy jańarttyq. Amankeldi, Jan­kel­dın, Uzynkól aýdandarynda deneshynyqtyrý-saýyqtyrý keshenderi boı kóterdi. Qostanaı qalasynyń ózinde úlken bas­seınniń qurylysy aıaqtalyp qaldy. Qazir ishki qurylys jumys­tary júrip jatyr. Sonymen qatar aldaǵy aıda muz saraıy kesheni paıdalanýǵa berilmek. Osynyń bári – óńirlik buqaralyq sportty damytýǵa yqpal etetin ıgi sharalardyń bastaýy, – dedi Arhımed Muhambetov.

Oblys ákimi Prezıdenttiń kásibı klýbtardy memleket ese­binen qarjylandyrýdy azaıtý týraly tapsyrmasynyń oryndalý barysyna da toqtalyp ótti. Onyń aıtýynsha, budan únemdelgen qarjy memlekettik tapsyrys­ty oryndaıtyn jekemenshik sport me­kemeleriniń ıgiligine jumsa­lýda. Búginde oblysta 3 myńnan astam bala túrli sport seksııalaryna tegin baryp júr. Olardyń ishinde turmysy tómen otbasylarda tárbıelenip jatqan 300 bala bar.

Marapattaý rásimi aıaqtal­ǵan soń fýtbolshylar jankúıer­lermen birge sýretke tústi. Sal­tanatty is-sharanyń sońy alys-jaqynnan kelgen estrada ánshi­leriniń konsertine ulasty.

Qostanaı