Premer-Mınıstr Úkimet otyrysynda Bilim jáne ǵylym mınıstrligine birqatar tapsyrma berdi.
«Birinshi. Bilim berýdi damytýdyń 2025 jylǵa deıingi tujyrymdamasynda joǵary bilimniń sapasyn qamtamasyz etý boıynsha naqty sharalar men ındıkatordy qarastyrý qajet.
Ekinshi. Qarjy, Ulttyq ekonomıka jáne múddeli memlekettik organdarmen birlesip, bıylǵy 22 qarashaǵa deıin Joǵary oqý oryndarynyń básekege qabilettiligin arttyrý boıynsha 2021-2025 jyldarǵa arnalǵan jol kartasyn pysyqtap, Úkimetke engizsin», dedi Asqar Mamın.
Sondaı-aq, ol Petropavl men Shymkentte Nazarbaev Ýnıversıteti úlgisinde 2 joǵary oqý ornyn ashýǵa qarjy qarastyrý kerektigin atady.
«Myqty degen 20 óńirlik ýnıversıtetti, Petropavl men Shymkentte «Nazarbaev Ýnıversıteti» úlgisinde 2 joǵary oqý ornyn ashýdy qarjylandyrý máselesin pysyqtaý kerek. Sheteldik jáne qosdıplomdy baǵdarlamalardy, oqytýshylar men stýdentterdiń akademııalyq utqyrlyǵyn damytý jumysyn jalǵastyrý qajet», dedi Premer-Mınıstr.
Sonymen qatar, Úkimet basshysy Bilim jáne ǵylym mınıstrligine múddeli memlekettik organdarmen birlesip, ǵylym men joǵary bilimniń biryńǵaı sıfrlyq platformasyn qurýdy pysyqtaýdy tapsyrdy.
Bul jumystyń bárin baqylaý vıse-premer Eraly Toǵajnovqa júkteldi.
