Tanym • 17 Qańtar, 2022

Kóleńkeden túsken kóleńke

106 ret kórsetildi

Siz qabyrǵadaǵy saǵatqa ýaqyttyń neshe bolǵanyn bilý úshin qaraıtyn shyǵarsyz, al ol onyń tyqylynan ótken kúnderdiń jańǵyryǵyn izdeıdi. Ýaqyt artqa jyljymaıdy, únemi alǵa umtylady. Onyń ulylyǵy sonda. Sizdiń ǵumyr saǵatyńyz toqtaǵan sátte ǵana, ol da máńgilik tynystaıdy. Urshyqtaı aınalǵan dúnıe ýysyńyzdan syrǵyp bara jatqan sátte qumsaǵat ǵumyryńyz qutyda óngen gúldeı solady emes pe!? О́mirdiń ózindeı…

Mark Shagaldyń «Saǵat» atty kartınasy – sheberdiń eń jumbaq jáne kózdiń jaýyn alatyn týyndysynyń biri. Kenepte nala men muń, eleń-alań sátter, jalǵandyq bar, tipti joǵalǵan ýaqyt sezimin syılaıdy.

Kartınanyń keńistigin tolyqtaı aǵash saǵattyń beınesi alyp jatyr. Kompozısııada aǵash qurylymyna tán qońyr reńk basym. Qara jáne qońyr shtrıhtar bólmeniń ashyq sary fonymen matasyp, qoıý tústerdiń sherýin túzedi. Bul tústi sheshim kenepke alańdaýshylyq pen beıdaýa kóńildiń áýenin beredi.

Úzdiksiz soqqan saǵat júregi erteń úmitpen oıanyp, taǵy bir tańnyń áldıin­de terbelýge jol ashady. Senimge baǵyn­baıtyn oılardyń qaqpanyna túsip qal­mańyz. Qustyń shıqylyna qarap, kúnniń qozǵalysyn anyqtaýǵa bolady.

Shyǵarmanyń massıvtiligi tómengi sol jaq bóligindegi jasandy kishkentaı tereze arqyly erekshelenedi. Áınektiń artyndaǵy qara jáne kók tańbalar saryǵa kontrast bolyp tur. Sál qısyq syzylǵan terezeniń ústinde kishkentaı áshekeıleri bar sary perde kórinedi. Bul bólmeniń barlyq elementi keńis­tikten oqshaý, monotondy jáne ýaqyt­tyń sharasyzdyǵyn beıneleý úshin bir tústi shemada jazylǵandyǵyn meńzep turǵandaı. Sharasyzdyqtan aýyr ne bar?!

Terezeniń janynan alysqa oıly kózben qaraǵan adamnyń kúńgirt kóleń­kesi kórinedi. Bul keskin úlken alańdaý­shylyqqa jeteleıdi. Bul adam ne oılaýy múmkin?! Ol tuńǵıyqqa batqan kemedeı oı ıirimine batyp barady. Quddy kóleńkeden túsken kóleńke ispetti.

Ýaqyttyń buljymas aǵymyn, artta qalǵan sátterdi eske túsiretin alyp saǵat tyqyldap, jalǵyz qalǵanyn jarııalaıdy. Qarapaıym adam qymbat sátterdi joǵaltqan beıbaq sekildi bar nárseni boıyna sińirgen tutas elementtiń fonynda eleýsiz fıgýradaı kórinedi. Al siz ne oılaısyz?!.

Sońǵy jańalyqtar

Uqsas jańalyqtar