Prezıdent Olımpıada jáne Paralımpıada ulttyq quramalarynyń múshelerimen kezdesti

– Dúbirli dodada el namysyn qorǵaý – mártebeli mindet ári zor jaýapkershilik. Bizdiń sportshylarymyz Olımpıada oıyndarynda talaı ret jeńis tuǵyryna kóterildi. Kók týymyzdy jelbiretip, ánuranymyzdy áýeletti. Sondaı sátte árbir azamatymyzdyń keýdesin maqtanysh sezimi kerneıtini sózsiz. Sizder aldaǵy saıysta halqymyzdyń senimin aqtaısyzdar dep senemin, – dep jigerlendirdi Prezıdent.

Memleket basshysy buǵan deıin Qazaqstan atletteriniń qysqy Olımpıada jáne Paralımpıada oıyndarynda jalpy 2 altyn, 4 kúmis jáne 4 qola medal oljalaǵanyn atap ótip, Olımpıada tarıhynda esimderi altyn árippen jazylǵan Vladımır Smırnov, Lıýdmıla Prokasheva, Elena Hrýstaleva, Denıs Ten jáne Iýlııa Galysheva syndy sportshylardyń dańqty jeńisteri azamattarymyzdyń patrıottyq sezimin arttyrǵanyn aıtty.

– Aldaǵy Olımpıadada sizder de laıyqty óner kórsetetinderińizge senimdimin. Paralımpıadashylar úshin de mańyzdy sát jaqyndady. Elimizde ınklıýzıvti qoǵamdy damytý jolynda Paralımpıada oıyndarynyń mańyzy zor. Qazaqstandyq paralımpıadashylardyń jeńisteri – maqsatqa umtylýdyń, tabandylyq pen óz kúshine degen senimniń úlgisi. О́kinishke qaraı, bizdiń sportshylardyń sońǵy daıyndyq kúnderi qańtardaǵy qaıǵyly oqıǵalarmen tuspa-tus keldi. Eń bastysy, yntymaq pen birliktiń arqasynda bizdiń halqymyz memlekettiń tutastyǵyna nuqsan keltiretin lańkestikke laıyqty toıtarys bere aldy. Biz búkil el bolyp ulttyq quramaǵa jankúıer bolatyn jarys kúnderi de jalpyulttyq birligimizdi kórsetetinimizdi bilemin, dedi Memleket basshysy.

Prezıdent sportshylardyń Olımpıada joldamasy jolynda jankeshtilikpen eńbektengenine toqtalyp, olardyń kásibı turǵydan jetile túsýine bar kúshin salǵan bapkerlerdiń de eńbegin atap ótti.

– Endi týystaryńyz ben jaqyndaryńyzdyń ǵana emes, mıllıondaǵan qazaqstandyq jankúıerdiń úmitin aqtaý kerek. Sizderdiń jeńiske degen jigerlerińiz – óskeleń urpaqqa úlgi, dedi Qasym-Jomart Toqaev.

Memleket basshysy buqaralyq jáne balalar men jasóspirimder sporty árdaıym elimizdiń basym baǵyty ekenin aıtty. Byltyrdan bastap óziniń tapsyrmasyna sáıkes sport salasyndaǵy memlekettik tapsyrystar boıynsha jan basyna  qarjy bólý iske qosylǵanyna toqtaldy.

– Bul sheshim sport seksııalary men aýla klýbtarynyń damýyna tyń serpin berdi. О́zderińiz bilesizder, 2022 jyldy Balalar jyly dep jarııaladym. О́skeleń urpaqtyń úılesimdi damýyn qamtamasyz etý úshin memleket pen qoǵam kúsh biriktirýi qajet. Qolǵa alynǵan osy is-áreketter balalarymyzdyń densaýlyǵyn nyǵaıtýǵa, olardy rýhanı, adamgershilik turǵysynan tárbıeleýge septigin tıgizerine senimdimin, dedi Prezıdent.

Kezdesý sońynda Olımpıada quramasynyń kapıtany Abzal Ájiǵalıev pen Paralımpıada quramasynyń kapıtany Aleksandr Gerlıs Prezıdenttiń qolynan Memlekettik tý alyp, ant berdi.

Qasym-Jomart Toqaev sportshylarymyzdyń kók týymyzdy Olımp shyńyna shyǵaryp, memleketimizdiń mereıin kótere berýine tilektestik bildirdi.