Keıbir kórshilerimizde áli kúnge deıin týlaqtaı jer úshin tartystyń júrip jatqany sonyń aıǵaǵy.
Memleket basshysy taıaýda shekaralyq beketterdiń saýda-ekonomıkalyq ómirimizdiń mańyzdy túıini ekendigine mán berip, keden salasyndaǵy, ásirese Qorǵas beketindegi birqatar bylyqtarǵa arnaıy toqtalǵan edi. Osy rette ǵasyrlar boıy bir ózenniń sýynan, bir daraqtyń nýynan nár alyp, órken jaıǵan baýyrlas halyqtardyń kedendik beketteri bıýrokratııalyq bógetten tys bolyp, elderimizdiń ekonomıkalyq damýyna serpin beretin qazynaly esikke aınalýy mańyzdy. Sondyqtan biz de búgingi baǵanymyzda Qordaıdaǵy qordalanǵan máselege toqtalsaq deımiz.
Qasiretti qańtar oqıǵasy kezinde irgeles jatqan baýyrlas elder shýaqty ún qatyp, júregimizdi qaryǵan yzǵardy jylytqandaı boldy. Alataýdyń arǵy jaǵyndaǵy baýyrlar Manas áýejaıyna tótenshe jaǵdaıda kezekten tys qonǵan jolaýshylarymyzdy jyly shyraımen qarsy alyp, meımandostyqpen kómek qolyn sozǵanyn qalaı umyta alamyz? Aq qalpaqty aǵaıyndar olardy qonaqúılerge ornalastyryp, shekaraǵa deıin shyǵaryp salyp, taksıge tegin mingizgen. Qyrǵyzstannyń zııaly qaıratkerleri, aqyndar qyzý úndeý tastap, halqymyzǵa qoldaý bildirdi. Qyrǵyz Respýblıkasynyń Prezıdenti bizdiń basylymdarymyzǵa suhbat berip, elimizge, memleket basshylyǵyna shynaıy qoldaý bildirdi.
Osyndaı tarıhtyń aýyr synaqtary kezeńderinde týys halyqtarymyz udaıy bir birine saıa bolyp kelgen. Shoqan men Boranbaı bıdiń, Súıinbaı men Qataǵannyń, Jambyl men Toqtaǵuldyń, Kenen men Ospanquldyń, Muhtar Áýezov pen Shyńǵys Aıtmatovtyń dostyǵy ańyzǵa aınalǵan. Eki elge ortaq han bolǵan Eńsegeı boıly er Esim týraly qazaq pen qyrǵyz ortaq epos týǵyzyp, eldik muratty úlgi etken. Áıgili «Manas» dastanynda da enshisi bólinbegen egiz halyq qatar sýretteledi. «Qazaq qaıyń saýǵanda, qyrǵyz Gısar aýǵanda, aq qalpaqty halqyma, asharshylyq jaýǵanda» degen jyr joldary aqtaban shubyryndynyń aýyr zardabynyń tańbasyndaı aýyzsha muramyzda saqtalǵan. Álbette, atam zamannan bizdiń rýhanı dińimiz, tamyrymyz, taǵdyrymyz ortaq, bul sabaqtastyq dástúri bolashaqta da jalǵasa beretinine kúmán joq.
Taıaý jyldary qazaq-qyrǵyz zııalylarynyń forýmy ıgi jaqsylardyń basyn qosqan dástúrge aınaldy. О́tken jyly pandemııalyq kedergilerge qaramastan Jambyldyń 175 jyldyq mereıtoıyn qos halyq birge joǵary deńgeıde atap ótti, ortaq alaman aıtys uıymdastyrdy. Bıyl da arǵy arnasy Alashtan taraıtyn eki elge ortaq Ahmet Baıtursynulynyń 150, Muhtar Áýezovtiń 125 jyldyq mereıtoılaryn qatar atap ótýge daıyndyq bastalyp ketti. О́nerimizdiń órisi men rýhanııatymyzdyń altyn qaqpasy bir-birimizge árqashan aıqara ashyq.
Alaıda osy jaqyndyqqa kedenimiz kedergi keltirip turǵandaı. Túptep kelgende qazaq pen qyrǵyz shekarasyndaǵy ótkelektegi túrli kedergilerden qarapaıym adamdar, ásirese shaǵyn kásipkerler men sharýaqor azamattar, ónim tasymaldaýshy isker toptar jónsiz zardap shegip keledi. Qordaı shekaralyq beketinen Qazaqstan aýmaǵyna asqaly turǵan aýyr júk tıegen kólikterdiń uzynsonar kezegi áldeneshe shaqyrymǵa deıin sozylyp álekke salady. Pandemııa bastalǵannan beri azamattarymyz tek qana áýe qatynasy arqyly júretin bolyp, olardyń avtokólik arqyly jolaýshylaýyna keden tarapynan tyıym salynǵan. Qyrǵyzstannan keletin jemis-jıdek, aýylsharýashylyq ónimderi kedende rásýá bolyp bógelgenshe, elge jedel jetse, qymbatshylyqtan qutqarýǵa septigi tımeı me? Qazaqstanǵa kelip saýda jasaıtyn, jumys isteıtin azamattar tıimdi eńbek kúshi emes pe? Sondyqtan Táńiri qosqan, tarıh pen taǵdyry ortaq, tili men túri uqsas, qudaıy kórshi qyrǵyz azamattarynyń Qordaı arqyly asýyna qolaılylyq týatyn mezgil jetti emes pe? Álde bul áldekimderge maıshelpek bolyp otyr ma? Qoıy qoralas, bazary aralas eki eldiń arasyndaǵy kúre joldy jabý kimge tıimdi?
Qazaqstan men Qyrǵyzstan úsh birdeı halyqaralyq uıymnyń – EAEO, ShYU jáne Túrki memleketteri uıymynyń múshesi bolǵandyqtan baýyrlas elderdiń aıryqsha yqpaldastyǵyna kedergi bolatyn jaıttardy da meılinshe azaıtý qajet degen oıdamyz. Túptep kelgende irgemizdegi Qordaı men Dordaı elderimizdi bólmeı, biriktiretin, jalǵap, jalǵastyratyn, halyqtarymyzdyń arasynda altyn arqaý bolatyn ómir jolyna aınalaryna senemiz.
