Oqıǵa • 23 Aqpan, 2022

Almatyda qarý-jaraq dúkenderin tonaǵan úsh kúdikti ustaldy

87 ret kórsetildi

Almatyda qarý-jaraq dúkenderin tonaýǵa qatysqandardy ustaý boıynsha eki arnaıy is-shara júrgizildi, dep habarlaıdy Egemen.kz Polisia.kz saıtyna silteme jasap.

Úsh kúdikti qamaýǵa alyndy. Urlanǵan qarýdyń bir bóligi «Dostyq» shaǵyn aýdanyndaǵy úılerdiń birinen, al ekinshisi – Almaty oblysy, Qarasaı aýdany aýmaǵyndaǵy Jambyl eldi mekenindegi úıden tabylyp, tárkilengen.

«Eki kúdikti 25 jasta, bireýi 27-de. 5 qańtarǵa qaraǵan túni olar «Kamerad» ańshylyq dúkenin tonap ketken. Qaskóıler urlanǵan zattardy úıdiń jertólesine tyǵyp, ústine qum basyp ketken. Ártúrli markadaǵy tórt tegis uńǵyly myltyq, avtomat, 720 patron, bes ańshylyq pyshaq, arbalet, optıkalyq kózdeýish jáne oq-dári tárkilendi jáne qylmystyq is materıaldaryna tirkeldi. Kúdiktiler kinásin moıyndap, dúkenge qalaı kirgenderin aıtyp berdi», dedi Almaty qalalyq Polısııa departamenti bastyǵynyń orynbasary Berik Ábilbekov. 

Tergeýshiler «úshtiktiń» osyǵan uqsas qylmystarǵa qatysy bar-joǵyn anyqtaýda. Qylmystyq is QR QK-niń 291-baby 3-bóligi (Qarýdy, oq-dárilerdi, jarylǵysh zattardy urlaý) boıynsha tergelip jatyr. Bul baptyń sanksııasynda bes jyldan on eki jylǵa deıingi merzimge bas bostandyǵynan aıyrý kózdelgen.

Sońǵy jańalyqtar

Dollar qaıta kóterildi

Qarjy • Búgin, 16:35

BQO-da Astana kúni atap ótiledi

Elorda • Búgin, 15:59

Uqsas jańalyqtar