Ulttyq paralımpıada komıteti habarlaǵandaı, Qazaqstan qurama komandasy 25 aqpanda Almaty qalasynan XIII qysqy Paralımpıada oıyndaryna attanady. Qurama komandanyń resmı tasymaldaýshysy - «Eır Astana» áýekompanııasy.
Beıjiń-2022 qysqy Paralımpıada oıyndaryna qazaqstandyq delegasııa koronovırýs indetine qarsy barlyq sanıtarlyq sharalardy qoldanyp, qatań karantın rejıminde attanady.
Sońǵy úsh jeti boıy paralımpıadashylar Almaty oblysy Talǵar aýdanyndaǵy «Alataý» shańǵy-bıatlon kompleksinde karantın rejımin qatań saqtap, Paralımpıada oıyndaryna sońǵy oqý-jattyǵý jıynyn ótkizdi.
Esterińizge sala keteıik, Beıjińde ótetin XIII qysqy Paralımpıada oıyndary 2022 jyldyń 4-13 naýryz aralyǵynda ótedi.
Bıyl Paralımpıada oıyndarynda 50 memleketten kelgen eń úzdik 700-den astam sportshy qatysady dep boljanyp otyr. Atalǵan tórtjyldyqtyń basty dodasynda 5 qazaqstandyq atlet el namysyn qorǵaıdy. Olar - Aleksandr Gerlıs, Erbol Hamıtov, Sergeı Ýsolsev, Iýrıı Berezın jáne Denıs Petrenko. Qazaqstan paralımpıadashylary eki sport túri boıynsha óner kórsetedi: parabıatlon jáne parashańǵy.
Paralımpıada oıyndarynyń ashylý saltanaty 4 naýryzda Nur-Sultan ýaqyty boıynsha saǵat 22.00-de ótedi. Saltanatty ashylý rásiminde Qazaqstan týyn álem kýboginiń qola júldegeri Erbol Hamıtov ustap shyǵady.
