Qaısar erterekte qysh pen qaýyrsynnan túrli músinsheler men ádemi kádesyılar qashap, onysyn saýdaǵa shyǵaryp kóripti. Biraq kóz maıyn taýysyp jasaǵan dúnıelerine biren-saran tapsyrys berýshilerden basqa, suranys bola qoımaǵan kórinedi. Esesine, búginde sheberdiń qolynan shyqqan som temir músinderdi kópshilik attaı qalap, satyp alyp ketip jatady. Alǵashqyda qaqpa syrtyn bezendiretin metall oıýlar men san alýan shaǵyn buıymdar jasap júrdi. Al qazir túrli janýarlar men qustardyń músinin jasaıdy. Qaısardyń qolynan shyqqan temir qustar elimizdiń ár túkpirindegi jeke turǵyn úılerdiń aýlalary men shaǵyn kásiporyn keńseleriniń aldyna sán berip tur. Mysaly, Qostanaıdaǵy saýda ortalyǵynyń aldynda turǵan oıýmen ásemdelgen temir dombyra da Qaısardyń qurysh qolynan shyqqan.
О́kinishtisi, sheberdiń jeke sheberhanasy joq. Ázirshe, bireýdiń garajyn jaldap jumys istep jatyr. Degenmen óziń úshin jasaǵan eńbektiń rahaty bólek bolatynyn jaqsy biletin sheber oǵan bola moıyǵan emes.
– Myna qyrandy bastan-aıaq jasap shyǵý úshin eki aptadan astam ýaqytym ketti. Salmaǵy aýyr, shamamen júz kılodaı bolyp qalady. Jaqynda Reseıge jiberemin. Tapsyrys berýshi sol jaqtaǵy dosynyń mereıtoıyna tartý etedi, – dedi Q.Nuǵymanov.
Al garaj-sheberhananyń aldynda turǵan qos degelekti kókshetaýlyq qurylys kompanııasy satyp almaq. Munyń baǵasy 1 mln teńgeden asyp jyǵylady. Sheber muny jasap shyǵýǵa eki aıǵa jaqyn ýaqyt shyǵyndapty.
– Jastaı osy ustalyq ónerge beıim turatynmyn. Qolymnan kelgen soń, eshten kesh jaqsy dep kirisip kettim. Árıne, jumysy kóp aýyr óner. Qatty sharshaısyń. Ár týyndymdy aıaqtaǵan saıyn qyzýym kóterilip, dirildep aýyryp qala berem. Biraq bir-eki kúnde qulan-taza aıyǵyp ketem de, qaıtadan temir izdeı bastaımyn, – dedi usta.
Qaısar usta aldaǵy ýaqytta el tarıhynan erekshe oryn alatyn qazaqtyń qaıratker tulǵalarynyń, handar men batyrlardyń shaǵyn bıýsterinen avtorlyq kolleksııa jasaǵysy keldi.
Qostanaı oblysy
