Jıynda Á.Marǵulan atyndaǵy arheologııa ınstıtýtynyń dırektory Aqan Ońǵaruly qol jetken tabysty zertteýlerdi tilge tıek etip, arheologııa ǵylymyn damytýdyń ózekti máselelerine toqtaldy. Onyń aıtýynsha, qazirgi kezde arheologııa, etnologııa boıynsha bes ýnıversıtet mamandar daıarlaýda. Buǵan qosa bul salamen aınalysatyn ǵalymdardyń 49,5 paıyzyn jastar quraıdy. Salany damytýǵa baılanysty mınıstrlik jolǵa qoıǵan mindetterdi júzege asyrý barysynda mamandardy mektepten bastap daıarlaý, stýdentter, jas ǵalymdarmen jumys isteý, odan bólek jetekshi ǵalymdarǵa jaǵdaı jasaý, jobalarǵa tartý jónindegi jumystar birte-birte jandanyp keledi. Osy oraıda Aqan Ońǵaruly «Arheologııa salasy boıynsha arnaıy topty daıarlaý qajettigine qatysty usynys engizip otyrmyz. Iаǵnı negizgi maqsatymyz – arheologııaǵa salalyq mamandardy daıarlaý», dep atap ótti.
Konferensııa barysynda ótken jyly el aýmaǵynda jáne kórshiles memleketterde júrgizilgen arheologııalyq jumystardyń nátıjeleri baıandalyp, ǵalymdardyń ashqan jańalyqtary jáne zertteý tájirıbeleri ǵylymı qaýymdastyqtyń nazaryna usynyldy.
Osy jıynda ǵalymnyń qyzy, medısına ǵylymdarynyń doktory Dánel Álkeıqyzy sóz alyp, ákesiniń eńbekterine degen qyzyǵýshylyqtyń zor ekenin atap ótti.
«Ákem kóp eńbek etti. Kózi tirisinde barlyq kitapty shyǵaramyn dep oılamasa kerek. Bálkim keıingi urpaqqa úmit artqany bolar. Otyz jyl boıy ákemniń jazbalaryn óńdep, arhıv muralaryn jasadym. Búginde ǵylymı eńbekteri 14 tom bolyp jaryq kórdi. Muraǵatpen jumys barysynda sonshama mazmundy ári keń aýqymdy dúnıelerdiń kóptigine kóz jetkizdim. Nebir sırek derekterdi kezdestirgende osynyń barlyǵy ákemniń eńbegi ekenine sený qıyn edi. Qazir oılap qarasam, baǵa jetpes qundy dúnıeler ekenine qaıran qalamyn. Ákem meniń bolashaǵym týraly kóp armandaıtyn. Meniń tańdaýymdy durys dep aıta almaı ketkeni, árıne, ókinishti. О́z shákirtteri men ǵalymdarǵa bilgenin úıretip, ǵylymı zertteýler tóńireginde aqyl-keńes berip, jaýap jazýdan esh jalyqpaǵan áke eńbegine degen qurmetim sheksiz. Ustazdyq ómirinde myńdaǵan shákirtke bilim bergen ǵalym retindegi eńbekteri bolashaq urpaq úshin azyq bolatyny anyq», dedi D.Marǵulan.
Álkeı Marǵulan eńbekterin zertteýdi Dánel Álkeıqyzy Sh.Ýálıhanov atyndaǵy tarıh ınstıtýty qyzmetkerlerimen birlese júrgizip, tom-tom etip qurastyryp, áke murasyn jandandyrýdy jalǵastyryp keledi. Ǵalymnyń etnoarheologııa salasyndaǵy zertteýleri, qazaq halqynyń mádenıeti men turmysy, salt-dástúri men ádet-ǵurpynan tanym beretin eskertkishteri týraly qundy eńbekteri, jazba derekteri ult bolashaǵy úshin óte qundy.
Konferensııa jumysyna elimizdiń jetekshi ǵalymdary, sondaı-aq AQSh, Ázerbaıjan, Belgııa, Italııa, Qyrǵyzstan, Ulybrıtanııa, О́zbekstan jáne Reseı ǵalymdary qatysyp, álemdik arheologııa jańalyqtarymen bólisti.
