Naǵyz Azamat eken!

74 kılo salmaq dárejesinde baq synaǵan Nurqoja Qaıpanov buǵan deıin Azııa chempıonatyn eki ret utqan. 2019 jyly Sıan jáne 2021 jyly Almatyda ót­ken jarystarda aldyna jan sal­mady. Odan bólek qan­dasy­myz­dyń qorjynynda álem chem­pıo­naty men Dúnıejúzilik ás­kerıler oıyn­darynyń kúmis medali bar. Bul jarysqa Qaı­panov jaqsy babynda kelgen eken. Bastapqy beldesýinde ol Rıo Olımpıadasynyń qola jáne Las-Vegastaǵy álem chempıo­na­ty­nyń kúmis júldegeri, Azııa oıyndary men qurlyq birin­shiliginde san márte atoı salǵan О́z­bekstannyń óte myqty balýany Ihtıer Navrýzovty bas kótertpeı utty. Kelesi aınalymda álem kýbogy men Azııa chem­pıonatynda úzdikter sanatynan kóringen Qyrǵyzstannyń kókjaly Islambek Orozbekovti 15:8 esebimen eńserdi. Fınalda Nurqoja Parsy eliniń ókili Iýnes Alıakbar Emamıchogaımen kúsh synasty. О́kinishke qaraı, sheshýshi básekede Nurqoja keńi­nen kósile almady – 2:5.

86 kılo salmaqta synǵa tús­ken Azamat Dáýletbekov osy­dan bes jyl buryn Nıý-De­lıde ótken sary qurlyqtyń bas­­ty dodasynda aqtyq synǵa alqynbaı jetkenimen, sheshýshi tusta ırandyq Alıreza Karımıge ese jibergen edi. Bul joly sol olqylyqtyń ornyn tol­ty­rýǵa tamasha múmkindik týdy. Ulan­­batyrda Dáýletbekov óz­bekstandyq Bobyr Islamov pen qyrǵyzstandyq Saıqabaı Iýsý­povtyń tas-talqanyn shyǵardy. Eki beldesý de merziminen bu­ryn aıaqtaldy. Fınalda ony Depak Pýnııa kútip turdy. 22 jas­taǵy úndistandyq sportshy ba­­ǵyn­dyrǵan belester bir tóbe. Osydan úsh jyl buryn Nur-Sultanda jalaýy jel­biregen álem chempıo­natynda dál osy sportshy kúmis medaldy moınynda jar­qyratqan edi. Desek te, Depakqa qarsy óte saýatty taktıka qoldanǵan Azamat Moń­ǵolııada óziniń myqtylyǵyn moıyn­datty. Fı­naldyq saıysta 6:1 esebi­men basym túsken Azamat Azııa chem­pıony atandy.

Qurlyq birinshiliginde úsh ret júl­degerler sanatyna qosylǵan Álisher Erǵalıdiń asa aýyr sal­maqqa aýysqanyna asa kóp ýaqyt bola qoıǵan joq. Desek te, onyń aıaq alysy jaman emes. Bul jarys­ta túrikmenstandyq Shattylyq Ne­melıaev (14:4) pen koreıalyq Iohen Chondy (9:6) jeńgen Álisher fınalda Iаadol­la Mohammadkazem Mohebıge jol berdi.

61 kılo salmaqtaǵy Aq­bar Qurbanov qola medal úshin kezdesýde Bahreınniń týy as­tynda óner kórsetip júr­gen da­ǵystandyq Alıbeg Alı­be­govten (5:4) basym tústi. 92 kılo salmaqta kúresken Ádilet Daý­lynbaev alǵashqy aınalymda ırandyq qarsylasynan oısyraı utylsa da, qola medal úshin talasý múmkindigin saqtap qaldy. Sheshýshi tusta ol japonııalyq Takýma Otsýmen aıqasty. Bul bir fınalǵa bergisiz aıqas boldy. Beldesý barysynda qandasymyz toǵyz upaı aıyrmashylyǵymen utylyp jatty. Otsý endi bir upaı­ǵa ıelik etse, aıqyn jeńiske jeter edi. Alaıda syn saǵatta na­­­mysyna qamshy basqan Ádilet qar­­sylasyn alyp uryp, qos jaýy­ry­nymen jerge qadady. Taza jeńis!

Qazaqstannyń erkin kúres sheberleri Ulanbatyrdaǵy Azııa chempıonatyn 1 altyn, 3 kúmis jáne 4 qola medalmen qorytyndylady. Jerlesterimiz jal­pykomandalyq esepte úshinshi orynǵa taban tiredi. Al kósh basynda – Iran quramasy. Parsy eliniń pehlevan­dary segiz júldege (6 altyn+1 kúmis+1 qola) qol jetkizdi. Ekinshi oryn­daǵy Japonııanyń enshisinde alty medal (2+0+4) bar. Ún­distannyń saıyp­qyrandary jeti ret (1+3+3) jeńis tuǵyryna kóterildi. Sondaı-aq Mońǵolııa (0+2+0), Qyrǵyzstan (0+1+4), О́zbekstan (0+0+3) jáne Ońtústik Koreıa­nyń (0+0+1) oǵ­lan­­dary Ulanbatyr kóginde óz elderiniń týlaryn jelbiretti.

Sonymen, kúrestiń úsh túri boıynsha Qazaqstannyń balýan­dary bıylǵy Azııa chempıonatynda 21 (5+8+8) júlde oljalady. Dál sondaı kórsetkishke Japonııa quramasy da (10+2+9) qol jetkizdi. Biraq altyn me­daldy áldeqaıda kóp jıǵan Kún­shyǵys eliniń ókilderi jalpy esepte aldymyzdy orap ketti. Son­daı-aq júldelerdiń sapa­sy jaǵynan Irannyń da (10+2+3) otandastarymyzdan kóshi ilgeri. Al sary qurlyqtyń ózge mem­leketteri bizdiń artymyzdan sy­ǵalap qaldy.