«Importty almastyrý baǵdarlamasy bekitilgennen keıin ımportty almastyrýdyń óńirlik baǵdarlamalary qabyldanady. Baǵdarlamalar ımport kólemin azaıtý jónindegi jobalardy monıtorıngilep, olardy iske asyrýǵa baǵyttalady. Baǵdarlamany tıimdi iske asyrý úshin biz bıznesti qoldaýdyń júıeli sharalaryn qatar júzege asyrýdy usynamyz», dedi mınıstr.
Osy rette Qaıyrbek О́skenbaev negizgi sharalarǵa toqtaldy.
«Birinshi, jobalardy qoldaý úshin ónerkásipti damytý qory men Qazaqstannyń damý bankiniń qarjylandyrý tetikterin paıdalanamyz. Ekinshi deńgeıli bankter men jergilikti atqarýshy organdardyń qarajatyn tartý múmkindikterin qosymsha pysyqtaımyz. Ekinshi, Bıznestiń jol kartasy baǵdarlamasyndaǵy tetikter qaıta qaralady. Bul ónerkásiptik kásiporyndardyń energııa resýrstary men ınjenerlik-kommýnıkasııalyq ınfraqurylymǵa teń qol jetkizýin qamtamasyz etý úshin jasalady. Importty almastyratyn jobalar úshin ákimdikterdiń qajetti ınfraqurylymmen qamtamasyz etýlerin usynamyz», dedi Qaıyrbek О́skenbaev.
Onyń aıtýynsha, úshinshiden, jobalardy nátıjeli iske asyrý úshin Bilim jáne ǵylym mınıstrligimen birlesip, memlekettik bilim berý tapsyrysy aıasynda ózimizdiń kadrlyq bazamyz qalyptastyrylady. Sonymen qatar kásiporyndardyń ınjenerlik-tehnıkalyq mamandaryn aldyńǵy qatarly sheteldik kásiporyndar men uıymdarǵa taǵylymdamaǵa jiberý josparlanyp otyr.
«Tórtinshi, óndiristik kásiporyndardy shıkizatpen qamtamasyz etý boıynsha jer qoınaýyn paıdalanýshylarǵa mindettemeler bekitý. Búgingi tańda alıýmınıı óndirýshilerimen qaıta óńdeýmen aınalysatyn 7 kásiporynmen kelisimge qol qoıdy. Mys pen qorǵasyn boıynsha da osy baǵytta jumystar júrgizilip jatyr», dedi ol.
