«Búgin Memleket basshysy tapsyrmasyna sáıkes ázirlengen «Halyqtyń tabysyn arttyrý» baǵdarlamasy týraly baıandalady. Baǵdarlama Úkimet qaýlysymen bekitildi. Qujatta Memleket basshysy Qasym-Jomart Kemelulynyń Jańa Qazaqstandy qurý ıdeıasyna sáıkes azamattardyń ál-aýqatyn arttyrý, tabys tapshylyǵyn joıý, jumys oryndaryn qurý mindetterin sheshý joldary qamtylǵan», dedi Úkimet basshysynyń orynbasary Ortalyq kommýnıkasııalar qyzmetindegi baspasóz máslıhatynda.
Onyń atap ótýinshe, halyqqa qatysty baǵdarlamadaǵy naqty jobalarǵa qoǵamǵa tanymal, eldiń ishinde ózindik orny bar azamattar jetekshilik etedi.
«Eldar Jumaǵazıev - qoǵam qaıratkeri, aýyl adamdarynyń tabysyn arttyrýǵa jol ashatyn «Aýyl tabys kózi» jobasyna jetekshilik etedi. Saıasat Nurbek - Parlament Májilisiniń depýtaty, jastardy ekonomıkaǵa qajetti kásipterge baýlýǵa baǵyttalǵan «Mamandyǵym – bolashaǵym» jobasyna jaýap beredi. Almas Jalı – «Kreatıvti ındýstrııa» baǵytyna jetekshilik etetin bolady. Emın Áskerov – áleýmettik kásipkerlikti damytý baǵyty boıynsha jumystardy júrgizedi. Yrza Tursynzada - qoǵam qaıratkeri, kópbalaly analardy jumysqa tartý baǵyty boıynsha «Baqytty otbasy» jobasyn Nur-Sultan qalasynda iske asyrady. Rahym Oshaqbaev - qoǵam qaıratkeri, baǵdarlamany aqparattyq súıemeldeý jumystaryna jetekshilik etedi», dedi Eraly Toǵjanov.
